مدونات جيران - fnoon - الى متى هذا حال DSL عندنا :أضف تعليقاً جديدا

إبحث عن أشخاص

عنوان المقال : الى متى هذا حال DSL عندنا

[English]

*كيت كات* المملكة العربية السعودية

13 مارس, 2007 09:11 م

غريبة والله الدي سي ال تمام التمام

بس الظاهر توكم مركبينه على شان كذا في مشكلة عندكم :(

الله يعينك والله

ان شاء الله فتره وتنحل المشكلة :)

afnan المملكة العربية السعودية

17 مارس, 2007 07:57 م

مراحب كيت كات

هلا الحمدلله هاليومين تعدل الله يتمم عليه(:

لكن وقت ما كتبت كان زفت من جد ):

لا من زمان مركبته

من حوالي ثلاث سنوات إذا مو أكثر

اللهم آمين

ربي يعين الجميع إن شاء الله

يسلموووووو على دعواتك الطيبه (:

شايب فاضي
22 مارس, 2007 06:49 ص

لا تساليني وشولون طحت عليكم هنا :)
والله مدري من الفراغ اقلب في صفحات النت وحصلت نفسي طاب على مدونتك( ما عرفت كلمت مدونه الا قبل اسم) :)
لا تضحكون علي :)

يؤ نسيت اقولكم مسائكم ورد وكادي .. وصباحكم فل وقهوه :)

با النسبه لمشكله الدي اس ال .. حدث ولا حرج .. لو اقولك انا وشلون جالس ما تصدقين ؟؟؟!!
عين على الشاشه والعين الثانيه على المودوم عشان اشوفه فصل الخط ولا لا هههههههه
مشكلتي اول مركبته كنت حاط المودوم في جهه بعيده عن نظري وكنت احس بصداع لانه كانت عيوني مشتته بس الحين ابشرك راح الصداع لانه المودم قدام عيني مجرد انه ارفعها اشوفه تعرفين المودوم الحين اهم شي عشان ما يفصل الخط وانقهر :(

حتى انه الدكتور يوم راجعته قالي انتبه لنفسك ؟؟ قلت له ليه؟ قال فيه انعزاج في عينك :(((
لا تصدقين ..
بس انشالله تكونون فهمتوا وش اقول :)
لانه احس اني اتكلم بلهجه غريبه :)
عاد لا تدققون مشوها ...

لا جد .. مشكله الدي اس ال عندك تكمن في عدة نقاط (وركزي على تكمن) لانه تعبت على ما قلتها :)
اول شي الاشتراك حقك لازم تكون شركه مو نصابه؟؟ كيف مو نصابه؟؟ لانه فيه شركات تحسب عليك عدد الكيلوات اللي تحملينها من النت .. وعشان تحد من هذا التصرف والضغط على السيرفر حقها تضعف اتصالك..
وثاني شي تاكدي من المودوم حقك..
وانصحك انه يكون سبيد تتش (يارب ما يكون هذا هو اللي عندك عشان ما يطيح وجهي)ههههه
لانه هو افضل شي موجود با السوق..
وثالث شي تاكدي انه مافيه خط 220 يمر فوق ولا تحت سلك التلفون لانه يسحب الشحنات الكهربائيه ..

تحسين انه انا اشتغل في الاتصالات؟؟
اللي يشوفني يقول فني دي اس ال وسنترالات :))

يالله عاد مشوها لي :))
ترى بحط مفضلتك با المفضله حقتي :)
عشان ادخل بكره اشوف رديتي علي ردي ولا لا :))
ايه بزعل اذا ما رديتي وبدعي انه كل خمس دقايق يفصل خطك :))

اسف على الاطاله ..
واتمنى لك التوفيق وربي يحنن الاتصالات عليك ويعطونك خط سرعته 1 قيقا ولا يفصل ابد :))

اتمنى لكم يوم حلووو..

afnan المملكة العربية السعودية

23 مارس, 2007 01:27 ص

حياك في مدونتي المتواضعه

ما راح أسأل طيب

الله يعينك ويعدل الحال عند الجميع

لازم المودم يكون جنبك لأنه سالفه كل مره تشيك وين حاطه

لا هاليومين صار أحسن الله يتمم عليه

الشركه اللي مشتركه عليها داون لود مفتوح مو محدود
و الموديم سبيد تتش
ما فيه اي اسلاك على سلك الهاتف

ايه والله من أسألتك قلت هذا يشتغل في الاتصالات

لا يحنون علي أنا بدفع بس يشبكون خدمه مثل العالم ا قيقا مبسوطين عليها

العالم وصلوا وين وهذولا يحسوون إنهم مسوين إنجاز على قيقا يتيم

المهم إن شاء الله الفرج قريب مع إعطاء رخص جديده لمقدمي خدمات الهاتف الثابت والجوال على الأقل منافسه وتعديل خدمات

الجميع يا رب

Mx-blog المملكة العربية السعودية

21 مايو, 2007 03:06 م

منذ طرح الخدمة .. ومشاكلها واجد

انا من اكثر 3 سنوات بإستخدام DSL

فريت الشركات كلها

مالقيت احسن من صحارى

والمودم سبيدتتش

والكابينة دلوعه :)

انتبهو من نسما .. الله لايعيدها شركة

بدر الشيحة المملكة العربية السعودية

25 مايو, 2007 04:18 م

احمدوا ربكم عندكم ريحة DSL ..

أنا طلبت الخدمة من الاتصالات من 10 شهور

وإلى الآن ما زودني بالخدمة :(

afnan المملكة العربية السعودية

26 مايو, 2007 01:57 ص

حياك مكس في مدونتي المتواضعه

نفس الشي لي ثلاث سنوات و زياده وأتوقع ما فيه شركه ما جربتها كل وحده أردى من الثانيه و إذا مر شهر و صار أوكي قلت الحمد لله الشهر اللي بعده ترجع حركات النص كم

و طبعاً كالعاده تتصل على الشركه يقولون لك من الاتصالات و الاتصالات من مزود الخدمه و إذا خلاص وصلت معاك تقول لهم كل واحد يحولني على الثاني قالوا لك من مدينة الملك عبدالعزيز

هذا من زمان لأن خلاص ما عاد أتصل عليهم لأن اتصلت أو لا ما فيه فايده انتظر لين يفرجها ربك

عاد نشوف لو اتصل عليهم أحد هالأيام بيقولون له من هيئة الاتصالات وتقنية المعلومات!!؟؟؟

والكابينة دلوعه= ما فهمت الصراحه

لا نسما أعرفها زفت من أيام الدايل اب وشلون على DSL ما فكرت أجربهم أبد

شكراً لك

afnan المملكة العربية السعودية

26 مايو, 2007 02:12 ص

حياك بدر الشيحة في مدونتي المتواضعه

الحمدلله يا رب

لكن إذا جربتها بتعرف معنى الكلام صح أرحم في كل الأحوال من الدايل اب لكن بتلاقي نفسك في أوقات مجبر تشبك دايل اب
لأن أوقات يفصل و أنت عندك شغله ضروري وش تسوي وقتها قديمك نديمك والأجر على الله

إن شاء الله توصلك قريب

من جد طويل الوقت أذكر وحده من خوياتي طول كثير

صارت تتصل عليهم كل اسبوع أو اسبوعين لين ركبوه عندهم و لا قبل الموعد اللي هم قالوه لها

و بعدين وين آفاق DSL التركيب في المدن الرئيسيه على كلامهم في وقت قصير

هذا الرابط ممكن يفيدك

http://www.stc. com.sa/cgi-bin/cws/portal/ep/b illing/STC_dslServiceActionGue st.do?tabId=0&stc_locale=a r_SA&BV_SessionID=@@@@1188 580902.1180156152@@@@&BV_E ngineID=ccddaddkmldjflhcefecgj edffgdgii.0

و أبشرك وقول ما شاء الله

طلبت خط ثاني DSL من اسبوعين والحين وصل لي

الصراحه قدمت من النت مسجله بينات الهويه و كل شي لأن ما أحب أتصل عليهم لا الجوال ولا الثابت ولا النت 902 / 905/907

يطفشون من جد الواحد يكلم عليهم المهم وبعدين كلمهم واحد من اخواني و وصلوا الخدمه

الاتصالات لازم تتصل عليهم باستمرار تستفسر ولا توصي أحد تعرفه هناك يشوف لك السالفه ولا ترى ما حولك أحد

ربي ييسر لك

Mx-b المملكة العربية السعودية

14 يونيو, 2007 06:35 ص

الكابينة دلوعه = يعني الكبينة رقمية ( يمكن إضافة خط الدي اس ال في وقت قياسي)

afnan المملكة العربية السعودية

19 يونيو, 2007 04:27 ص

شكراً على التوضيح

هذا شي من الاتصالات يعني ما باليد حيله للأسف
وتفرق في السرعه بعد

الله يرزقنا