Cinnamon Zone: حكي فاضي

Top (something) reasons not to talk to people

Thu, 04 Jun 2009 00:26:00 GMT

1. Because they are boring

2. Because you are boring

3. Because they don’t listen

4. Because they talk too much about themselves

5. Because they want you to do all the talking

6. Because they are too pessimistic and grumpy

7. Because they are annoyingly optimistic

8. Because you have so little in common

9. Because you don’t know what to talk about

10. Because you’re afraid that you might “spill the beans”

11. Because they are too vulgar

12. Because they are too refined

13. Because they are too opinionated

14. Because they can’t have a say in anything

15. Because they lie

16. Because you don’t want to lie to them

17. Because you can’t stand them for some reason

18. Because you have great chemistry and you’ll afraid to fall in love with them

19. Because they are crazy

20. Because there’s no time

21. Because they don't understand...

There’s always a reason…

بنت عيشة... بس سمرا

Sat, 19 Jul 2008 13:14:00 GMT

في أشياء لسا مش قادرة أستوعبها فس مجتمعنا، يمكن أنا استيعابي بطيء أو يمكن هاي الأشياء مش مفروض حدا يستوعبها أساساً

يعني لما وحدة تكون متزوجة واحد بعاملها، عفواً، أحسن من الزبالة بشوي، وبعمل فيها كل عملة ولا التانية، ومين ما بسمع عمايله، عفواً، بتف عليه، وبعدين بس يقولوا إنه البنت كانت ساكته عليه وما تحكي لحدا بقولوا...

"شكلها بنت عيشة وبدها السترة"

ليش هي كاينة مفضوحة عند بيت أهلها؟ وبعدين إذا هو مش "ابن عيشة" وإذا العيشة اللي عايشتها مش عيشة ليش بدها تكون بنت عيشة؟؟

طيب سيبونا من اولاد العيشة، أنا مش فاهمة شو عقدة البياض والشقار عنا إحنا العرب اللي مش قادرين نقضي عليها! كإنه الشقار رمز الحسن والجمال والسمار رمز البشاعة والقباحة... الله يقطع (فير أند لافلي) بس!! قال بيجيبوا البنت بتكن لابسة اواعي بتخزي ومبينة رح تعيط من الخوف وبعدين بس تستعمل فير آند لافلي فجأة بتصير عندها ثقة بحالها وأواعيها مرتبة! وقال شو قال بتنقبل في الوظيفة عشان بشرتها (مش عشان تغيرت 180 درجة) مزع...

بلاش دعايات فير أند لافلي؟ كم مرة سمعتوا جملة زي هاي:

"البنت بتجنن، بس إمها إنسي الموضوع سمرا وحالتها حاله!"

حالتها حاله؟ إيش يعني عندها شلل أطفال؟

هديك اليوم سمعت وحدة بتقارن بين وحدة وزوجها وبتقول إنه زوجها أحلى منها بكتير أما هي فـ"سمرة"، يعني كإنه ما في داعي توصف أكتر من هيك إنه خلص سمرا يعني أشكيف، بتتذكروا الأشكيف؟؟ طبعاً أنا كنت قاعدة وكوني سمرا واعتبرتها إهانة قررت ما أسكت وزتيت كلمة لما إجت فرصة مناسبة، وما في داعي أدخل هلأ في مزايا السمار وفوائده خصوصاً للبنات، بكفي إنه الناموس ما بقرب علي بدون ما أحط فيب ولا إشي، بينما إخواني بتهبروا في الصيف! الحمد لله يا ربي... وبكفي إني بكون مريضة وما بحس في داعي أحط إشي على وجهي عشان ما أبين صفرا ومسحوب لوني

طيب، ما علينا...

وكإنه إحنا ناقصنا ستيريوتايبس وتفكير محدود عشان يجيبولنا مسلسل تاني يحدد أفكارنا ويضيع وقتنا أكتر وأكتر... طبعاً عن بحكي عن زفت الطين "نور"، مع الاعتذار لكل وحدة اسمها نور

أولاً، المسلسل اللي بطلع عليه نظرة محايدة بشوف إنه أتفه من التفاهة، لأ ليش هيك بنغلط بالتفاهة أصلاً، لسا التفاهة ممكن تكون مبتكرة، هادا المسلسل تفوق على جميع المقاييس وعمل فئة جديدة لحاله، يعني في تفاهة وبعد التفاهة بتيجي "نور"...

أنا عن نفسي ما بتابع المسلسل بس بما إنه وين ما تروح بتلاقي عالتلفزيون وبما إنه الأحداث اللي فيه فش فيها أي نوع من الغرابة أو التجديد وكل 10000 حلقة بصير تطور جذري فصرت أعرف القصة...

ما بدي أبدا الحكي عن القيمة الاجتماعية عن المسلسل لأنه باختصار مسلسل تركي وقيمه علمانية، بس ما بدي أفوت في هادا ابموضوع وخليني في القيمة الفنية (شبه المعدومة)

يعني أنا نفسي ألاقي إشي مثير للفضول أو الاهتمام في المسلسل، إنه أي مسلسل سوري أو مصري أو أردني لسا أحسن منه وعلى الأقل ما بضل 90 حلقة! يا دوب 30 حلقة وانتهى الموضوع... يعني محور المسلسل كله عن حياة عائلة، عادي يعني عائلة واحداث بتصير، طيب؟ شو علة هالقلب هاي؟ وطبعاً كل ما تلاقي القصة سكرت يا واحد بعمل حادث، يا وحدة بتسقط حملها، يا واحد بنجلط (طبعاً كالعادة الجد الكبير كل 5 دقايق ينجلط، والعجيب إنه بدو يتجوز... نفسه خضرا) يعني لا ابتكار ولا تجديد ولا بطيخ مبسمر، واللي بجلط إنه حتى الأطفال بتابعوه، وبدنا أطفالنا يطلعوا مبدعين ويفكروا خارج الصندوق (آوت أوف ذا بوكس)، كيف طيب كيف وهم عم بتفرجوا على مسلسل بعرض مشاكل نور ومهند اللي مش كاينة تخلص وكأنها محور حياتهم؟؟

وكله كوم ومهند كوم! إنه خلص إنت يا بيرفيكت يا سوبر مان! وكل ما يطلع مهند عالشاشة بتلاقيهم حطوا موسيقى هادية إنه إجا الدونجوان (مع الاعتذار لجوني ديب)، والمشكلة إنه كل هالرومانسية والحب والغرام وبعدين ما بلحقوا يحكوا كلمتين مع بعض إلا بتخانقوا! زي كإنهم اتنين مراهقين مصاحبين مش اتنين كبار عاقلين متزوجين... أي قرف اللي يقرفكوا! إنه مش عم تفهموا على بعض اتطلقوا يا أخي، خليها تروح تتزوج عابدين المريض النفسي وخليه هو يروح يتزوج بطيخة نهال! هاي قصة تانية طبعاً، قال وحدة دعستها شاحنة وهي حامل وضلت عايشة في السر وخلفت ولد كمان (شكلها بتقرب للمخرج)، وقال عشان يزبطوا الحبكة قالوا كانت ما بدها إياه يعرف إنها عايشة، يا عيني على التضحية والإيثار! طلعت تركيا المدينة الفاضلة تاعت أفلاطون! تاهت ولقيناها... أما مهند، فكيف واحد مرته بتكون نكدة كل هالنكد وبكون لهالدرجة منيح؟ وفوق هيك بكون توب موديل ومعاه مصاري نعف، يعني بخلي البنات يفكروا إنه نور مش احسن مني، يا بيجي واحد زي سي كازانوفا بسلامته يا بديش.... وعيش يا قديش لينبت الحشيش..

وأحلى إشي كيف فجأة الممثلين بتغيروا... عادة في المسلسلات الأمريكية مثلاً لما ممثل يضطر يغيب عن التصوير بغيروا القصة، مثلاً لما "بري فان دي كامب" في "ديسبيرت هاوسوايفز" غابت عن المسلس عشان تولد، بكل بساطة عملوا في المسلسل إنها سافرت وصورا كم لقطة إلها من ورا من دون ما يبين وجهها كانت فيها ممثلة بديلة مش هي نفسها، وزادوا مشاهد "إيدي بريت" وبكل ذكاء المسلسل مشي وبالعكس يمكن نجح أكتر لأنه في ناس بحبوا شخصية "إيدي"... مش بكون واحد شعره لكتفه وما عند شوارب فجأة في الحلقة اللي بعديها بصير واحد شعره قصير وعند سكسوكة... وبعدين شكلو الأطفال بكبروا بسرعة رهيبة في المسلسل، يعني "رقية" ولدت و"نور" لسا حامل، وصارت بنت رقية مبين عمرها سنة ونور لسا حامل.... شو حامل بفيل؟؟ بس أكتر لقطة بتضحك واللي بتستاهل جائزة لما كان عابدين خاطف نور وبربطها في حبل وبقلها إنهم لازم يكونوا مع بعض وهي بتقول له: "إحنا أصدقاااااء" حمارة هاي؟

يعني باختصار، هادا المسلسل تفوق على ذا بولد أند ذا بيوتيفل وذا يونغ أند ذا ريستلس وعلى دايز أوف آور لايفز... لحظة لحظة، بعد التفكير يمكن لسا ما تفوق على ديز أوف آور لايفز، لسا بدهم كمان شوي، منيح إنه المسلسل لسا ما خلص!!

على كل حال، هاي نور شكلها مش "بنت عيشة"، منيح اللي مهند متحملها فوق ماى هي "سمرا"...

وعجبي

Meet The Kinder's

Sat, 01 Dec 2007 21:06:00 GMT

Despite the fact that I love Kinder Surprise, this is my way of saying I'm having a self-induced blogger's block.

[Off the record] why do we have touch-screen ATM's if they don't work? How annoying is it when you keep tapping your finger on the "balance inquiry" button to the point that you finally strike the screen with your fist, only to have it tell you that you didn't respond whithin the allowed time! Wait till you hear the best part, this thing TALKS! Not only talks, you get the impression it wants to shout your transactions form the rooftops...Yes, everybody in the mall needs to know that you're withdrawing money!

I was just about to throw in a slightly rude pun, but I think this is enough ranting for today...

اعرف مرشحك: ونعم المعرفة بصراحة

Sat, 17 Nov 2007 14:16:00 GMT

و: نفسي ألاقي واحد يشتري صوتي في إربد

ع: طيب صوت لهداك الزلمة "فلان الفلاني">>>> (مزح)

و: ليش إنتي من وين بتعرفيه هاد؟

ع: طبعاً بعرفه! الكل بعرفه... عامل ضجة غير شكل الكل بدو يعرف مين هو

و:يا دي الفضايح! فضحنا

ع: ليش هو بقربلك؟

و: طبعاً، قرابة لزم كمان...هادا واحد عاطل بكل معنى الكلمة! أولاً سكرجي... إنت لو تعرفي كيف ترشح للانتخابات. هادا في واحد من عيلة كبيرة في إربد محترم مرشح حاله، فقام فلان الفلاني دفع لهاد مصاري ونزله عالانتخابات عشان يوقف ضده ويرسبه

ع: وااااال

و: وك هاد عنده بسطة ورد وكاتب في البيان الانتخابي "خبير زراعة وإنتاج نباتي". يعني أنا مش عارف واحد زي هاد شو بدو يكتب في بيانه الانتخابي غير إنه بعرف كل أنواع المشروب...

ع: هاهاها ولا إشي!

و: لأ ولسا، بقولك في البيان الانتخابي: قائد كتيبة دفاع جوي في معارك لبنان وعضو في جمعية مناهضة الصهيونية عام 1977... وبعدين بقولك "يعيش في مخيم إربد وسيظل يعيش في مخيم إربد"...

ع: هاهاهاها

و: أنا كنت قاعد هيك ولا أبوي يقول لي تعال شوف "ستالين" النازل عالانتخابات... رحت ولا هو طلع قرابتنا!! هادا راح درس في روسيا فلما رجع كان يشرب قال عشان في روسيا كان برد والمشروب بدفيه، ولما إجا هون لقا الدنيا برد فضل يشرب عشان ما يمرض...

ويبقى السؤال -وبدون ذكر أسماء بما إنه كان حديث جانبي على ذمة الراوي-: شو موقفنا أمام العالم والشعوب المناضلة في إفريقيا وأمريكا اللاتينية ونيكراغوا والدول المتحضرة ودول الجوار والشعوب الشقيقة والصديقة والمحبة للسلام لو هادا الزلمة (بدون ذكر أسماء) نجح وصار في مجلس النواب؟

I'm Running for the Elections!!

Mon, 12 Nov 2007 09:54:00 GMT

آى... مش أنا حرة؟ بدي أرشح حالي! صحيح أنا تحت السن القانوني لكن إذا بدي أرشح حالي في المستقبل إن شاء الله لازم أستعد من هلأ، لأنه أطفال اليوم ناخبوا المستقبل، فأنا قررت ألعب على هاي النقطة وأركز حملتي الانتخابية على استهداف هذه الفئة من المجتمع الأردني الواحد. بس أولًا لازم نبدأ بالديباجة المعتادة من باب الحفاظ على التقاليد:

إخواني...

أقوال لا أفعال، المرأة نصف المجتمع، أطفالنا أكبادنا تمشي على الأرض، لا للضرائب، نعم لحق العودة، لا تطبيع مع إسرائيل، القدس وعمان توأمان، كلنا للوطن، كلنا الأردن، كل الأردنيون أردنيون (لا؟ أنا كنت مفكرة نصهم أردنيين ونصهم موزمبيقيين)، لا للغلاء، صوتكم أمانة، حقوقكم أولاً، الصدق أولًا، الديمقراطية أولاً...

نيجي للمفيد، زبدة الزبدة، الصافي، من الآخر...

أولاً، رح أمشي على مبدأ طعمي التم بتستحي العين، بس ما رح يكون في مناسف في بيوت شعر، لأنه بما إني عم بستهدف الجيل الصاعد فرح أوزع كوبونات مجانية لكل مطاعم الفاست فود اللي في البلد، ما رح أخلي هارديز ولا برغر كينغ ولا ماك ولا أزبل مطعم في البلد يعتب علي. طبعًا هادا الإشي إلوا فوائد أخرى، وهو إنه الطفل بس تضل تحشيه جنك فود على مدى عدد معين من السنوات بوصل يوم الانتخابات عقله في جزمته ومسكرة معاه ومش شايف الفضى... قول له انتخب القرود السود بقوللك ع راسي. فهاي هي الخطة الخماسية هون، زمن المناسف راح

ثانيًا، شعارات مناهضةالواسطة والمحسوبية هاي كلها بديش إياها. نعم للواسطة، نعم لمحاباة القرايب والحبايب، نعم للعشائرية... اللي بدو رخصة سواقة، عندي، اللي ابنه جايب 65 فرع أدبي وبدو يدخله طب، عندي، أي معاملة في مؤسسة حكومية عندي موضوعكم، إنتوا بس وصلوني للبرلمان وما عليكم! لأنه بصراحة ما بدي أقعد أتخوت وأقول لا للواسطة وكل الأردنيون سواء وبس أحط رجلي في البرلمان وكل ولاد عمامي وخوالي وصحابهم يدخلوا طب وهندسة وياخدوا رخص عمومي يحكولي في مساءلة قانونية... الصراحة راحة وأنا قلتلكم من الأول، أنا بحب أستفيد من مركزي تو ذا ماكس، ولا نائبة واضرب واطرح عالفاضي!

ثالثاً: لاستمالة المثقفين في البلد، بدي أكتب كتاب أسميه "كفاحي" وأوزع نسخ منه ببلاش على كل ناخب، وبدي أحضر كل المسرحيات الأردنية وأعمل زيارات دورية لنقابة الفنانين وأدعم الدراما الأردنية وأطلع ضيفة شرف في كل مسلسل بدوي وأطلع على يسعد صباحك وأوقف أغني "يا مصور صور عمان" (بلاي باك طبعاً) والمذيعة المسكينة واقفة تزقفلي وتطلع علي، وأنشر 600 مقال في جريدة شيحان... هيك ببين واحدة فهمانة ومطلعة على الحركة الثقافية في البلد

رابعاً: من باب استهداف فئة الشباب، بوزع تذاكر سينما ببلاش، وتذاكر مباريات الدوري الأردني، وبوزع اشتراكات الجزيرة الرياضية عشان يشوفوا مباريات برشلونة وريال مدريد، بس طبعاً لا يمكن تحت أي ظروف إني أكشف مين بشجع...

خامساً: اللافتات الانتخابية هاي شكلها مش جايبة همها، أنا بفضل أطبع صورتي على بكيتات شيبس وشوكولاتة وعلب كبيرت وبكيتات فاين، اسمه إشي بستفيدوا منه الناس... وأهم إشي أحط صورتي على بكيتات السجاير، بس طبعاً عشان ما يزعلوا حماة البيئة بحط صورتي وأنا مكشرة وبحذر من أخطار التدخين، وهيك بضرب عصفورين بحجر: بتسلل إلى اللاوعي للمدخن الأردني، وأحصل على التقدير الواعي من غير المدخن...

سادساً: إذا ما نفعت كل الأمور المذكورة أعلاه، بستأجر كم واحد دواوين من الآخر، إشي من قاع الدست، بوزعهم على البلد وبشتري لكل واحد موس كباس سويسري أصلي... إحنا ما بدنا نغصب حدا، بس إذا الشعب مش عارف مصلحته، عدو نفسه، فلازم علينا كمرشحين نورجيهم غلطهم بس

سابعاً وأخيراً: بضرب صحبة مع محمد الوكيل، ما بعرف كيف ممكن أستفيد منه بس عندي شعور إنه ممكن ينفعني في الحملة الانتخابية الشعواء... إضافة إلى إنه بدي أحاول ألاقيلي صلة قرابة من أي نوع مع نمر بن عدوان أو الملك فاروق

عودة إلى التقاليد:

نحن منكم وإليكم، نعمل لأجلكم، انتخبونا تجدوا ما يسركم... وعلي وعلى أعدائي