طُظيَّات محجوب عبد الدايم: الأيام، ياسوادي

بقايا أيام التطهر

Thu, 17 May 2007 08:47:00 GMT

و كأني...

و كأنك أنِّي

و كأن الآن يإنُّ بصدر الكون المُتَأني

بنقاء القار برونقه

و بروعة طفل خطيئة

سَقطٍ متدنى

يتلمسنى..

يسكب أقماع الثلج بلون الدم

يُغَسِّلُني

أتلَمَّظ.. أجزع من لوني

و أبعثر ذرَّ حريق النفس..

أبعثرني

أنثر أياماً قد غبرت

أنثر أحلاماً قد بردت

أتسكع أملاً لأجدني

أتمكن من عنق التاريخ أزلزله

أهَدْهِدُهُ...

فيدمرني

أتحامل على أوصالي النخرة

و أواصل نثر الشك..

يداخلني

أتحضَّر...

أتحدَّر أكثر..

أتبلَّع غص السم الوردي..أصبرني

أتمرد..

بغباءٍ بذكاءٍ لا أذكر

ينقطع الحبل السري الموصول ببطني

و هويت طويلاً ما أدري

كجاثومٍ متكرر أبدي يكنفني

و هويت جاثومي...

تعشَّقته

و أردت الهوَّة بل صلَّيت أن ابلعني

أتكوم في ركن اللاشيء و أرمقهم

..أوهام العظمة و الاحلام تودعني

تصغُر تتكورُ تتلاشى

تسوَدُّ و تَبْرُدُ...

لا تعني

طظ

محجوب عبد الدايم

القاهرة 1930.

والدي الـ إتْفٌوّ

Mon, 14 May 2007 05:16:00 GMT

الطظية ذات طابع خاص جداً، و أعاهد الله أن أقولها له كاملة إذا اتيحت لي الفرصة.

والدي العزيز... سابقاً

دعوتك والدي حقاً. لم أعرف لي أباً سواك. و منذ نعومة أظفاري، كانت صورتك الأشهر و أنت ترفع العلم هي أول ما استطاعت عيناي المترددتين التقاطها من على شاشة تلفازنا القديم. كانت والدتي تصفق حقاً في جذل و ابتهاج، إذ تراني أتأتئ

" أُوسني مُبالَك"

ثم كبرت قليلاً

و أثناء المرحلة الإبتدائية، كنت أحير الأساتذة بأسئلتي المتكررة عنك، و باهتمامي الزائد بكل ما تقول و تفعل. حتى أن موجه الدراسات الاجتماعية قد أصابته ريبة شديدة عندما كنت أحدثه عن فترة السماح و المشاريع الصغيرة التي كنت تعد بها، حتى غمزه مدرسي الأثير(مدحت) قائلاً " أصل (محجوب) ده ولد سياسي". ثم ارتسمت على وجهيهما إمارات الفهم، مع ضحكات غامضة مريرة.

أصابني الكثير من الفخر ذلك اليوم. و صرت مزهواً بين أقراني. كنت أروح و أغدو دارساً لكل ما تصدر من قرارات، و كل ما يحدث من حولك. مؤمناً تمام الإيمان بعبقريتك الفذة، و مواهبك الصارخة، التي عبرت بنا إلى شاطئ الأمان... إلى النصر، في فترة مظلمة كاحلة، من التعتيم الإعلامي الحديدي، من طراز "كل بلاد الدنيا جميلة، لكن أجمل من وطني لا".

كنت قد درستك و حفظتك كما ينبغي لطالب المدرسة الابتدائية الأميرية المجتهد أن يفعل بمواده الأساسية. لقد كنت مادتي الأساسية.

ثم كبرت قليلاً... مرة أخرى

بدأت أشعر برجولتي تزحف على وجهي في شكل زغب كثيف. يالفرحتي، قد أصبحت رجلاً، لا يمكنك تخيل مدى سعادتي عندما حلقت ذقني للمرة الأولى. كنت أرتجف نشوة. ظننت أنه أعظم ما يمكن أن أنجز. و بدأت أتمرد...

كنت ولدك كما ينبغي. كنت متعصباً لك إلى أقصى الحدود. حتى أن أبي الذي أعطاني اسمه، كان يعاني الأمريَّن و هو يحاول من قريب أو بعيد نقد أحد قراراتك الحكيمة. لم يكن لينجو من لساني الصلت، و كأنه قد قُدَّ من لجاجة و جدل. أبهرت ذلك الرجل المسن، لم يخف إعجابه الشديد بابنه اللبق، إلا أنه طالما تمنى أن أحظى بالقليل من التفهم. مسكين هذا الأب. لم يكن يعي مقدار تعلقي بك. و كأنه كان يغار. أحسبه كان كذلك، ولا ألومه مثقال ذرة.

ثم حدث أن كبرت كثيراً هذه المرة... كثيراً جداً

خرجت للدنيا باحثاً عما قرأته في الكتب و رأيته في التلفاز عن منجزاتك، و معجزاتك. كنت متأكداً منها تأكدي من وجود الآخرة. لم يكن ذالك غيباً أبحثه، كان حقيقةً أردت أن أعيشها و أرتع فيها. كنت قد تعلمت أنه مهما كانت الصعوبات، أو المساوئ، فأنت لست مسئولاً عنها، لأنك .. أبي.. و أبي لا يرتكب الأخطاء، هو منزه عن كل نقيصة، كذلك يظن كل ابن. كانت المسألة كلها خطأ هنا أو هناك، من موظف مهمل، أو وزير فاشل، بينما كنت دائما فوق الشبهات. كنت أبي حقاً.

و خرجت لبلدي كما كنت أظنها، ارتئيت أن أبدأ مساعدتك في حملك الثقيل، و أن أحمل عنك الأعباء، محدثاً و مطهراً.

بس لقيتها اتباعت

و ساعتها اتجننت، و صرخت، و دعكت عينيه كتير. هي فين؟ فين مصر؟ فين مصر ياولاد الـ..؟ هاتوا الخرايط ! لازم ألاقيها. و مافيش فايدة. و يوميها عرفت انك مش أبويا. مش أبويا اللي يعمل كده في أمي. و عرفت اني قعدت عشرين سنة أحب في صنم. عمره ما حس بيا، عمره ما بص وراه و شافني باتنطط تحت رجليه و باشد طرف هدومه.

كنت قد شِخت..

مش أبويا يا (ابن نعيمة) عمرك ما كنت أبويا. أبويا اللي انطحن علشان يربيني و يعلمني ما كانش انتا. انتا اللي كنت بتسهر الليالي علشان تبيع الجامعة اللي هاتعلمني. و انتا اللي جريت بالمشوار علشان تجيبهم يحطوا رجليهم فوق رقبتي و يتكوا بالجامد أوي. عارفهم يا (ابن نعيمة)؟؟ عارفهم ولا أعرفك؟ لا تعالى لما أعرفك

بتوع الحديد و المقاولات يا (ابن نعيمة)، و بتوع الشنبات و الطبنجات. عارف كمان بتوع المايوهات و الشاليهات؟ عارفهم يا (ابن نعيمة)؟ و القحف أبو ليّة بتاع الجمهورية، عارفة؟ كلنا عارفينه، قوة القتل الثلاثية. و الناس اللي مش ناس، النضاف بالقوي دول، اللي بيبرقوا من بره، اللي عمرهم ما عرفوا طعم الطعمية. فاكر الطعمية يا (ابن نعيمة)؟ فاكرها؟

بعتها بالقطاعي يا (ابن نعيمة)؟ بالحتة و في المزاد؟ و ياريته كان مزاد، قال كل واحد ماسك عليك ذلَّة كان يجي و ياخد ببلاش. طب و انا؟ ابنك ضناك؟ دانتا ياما رسمت عليا دور الأب انتا و مراتك الزومبي، و قعدتوا تبلفوا فيا و تقولولي بابا زفت و ماما قطران اسود، فين؟ فين الأبوة و الأمومة؟ طب ليه يا (ابن نعيمة)؟ بعت ليه؟ أمال كنت بتحارب عشانها ليه م الأول؟ ولا هي الحكاية كانت سد خانة؟ ولا أساسا انتا ما كنتش موجود يوميها؟ فاكر يوميها يا (ابن نعيمة)؟ تلاقيك و الله مانتا فاكر تمسح ريالتك حتى، اللعنة على الأصنام.

بص بقى م الآخر، علشان انا خلاص، خلصت بنوَّة، بطلت مشاعر و شعارات، نشفت، نملت، ما عادش فاضل. قفلنا، شطبنا يا (ابن نعيمة). لكن لما تيجي تستهبل عليا تاني و تقوللي انك أبصر مادرك يلعن يحرق مش عارف هتعمل ديموقراطية إيه، و مافيش توريث، و مافيش تمديد، يبقى لازم أتف في بقك.

أيوة في بقك النجس. لما تستهبل عليا و تقوللي (جمال) مش جاي، و انتا بتقعّده على حجرك المبلول، و بتمَسِّكهاله و احنا كلنا بنبص، و بتعدلّه الدستـ... ههههه إلا صحيح، فكرتني بنكته

بيقوللك يا ... يا (ريّس)، إسرائيل ما عندهاش دستور. سمعت انتا عن الحكاية دي؟ سمعتوا ياولاد عن الحكاية دي؟ إسرائيل ماشية بـ(مجموعة من القوانين الأساسية). و دايسة على رقبة التخين... فاكر التخين يا .. يا (ريّس)؟

و قعدنا نتشال و نتحط، و تعديلات دستورية و ما دستورية، و الحكاية في الآخر مالهاش لازمة من بابها يا (ابن نعيمة). (ابن نعيمة) استعبط الشعب بحاله. و الله مانا عارف، أضحك ولا أصرخ.

لما ابقى ابنك عشرين سنة يا (ابن نعيمة) لما أبقى عاجنك و خابزك، ماتبقاش ترسم عليا الدور ده تاني. عيب، عيب أوي يا... يا (ابن نعيمة). مبروم على مبروم ما يلفش يا... يا ابا

أكبر صدمة ممكن تاخدها في حياتك يوم ماتعرف انه أبوك، عمره ما كان أبوك. يومها بتحتقره، و بتحتقر نفسك، و بتحتقر أمك، و بيتكم، و الشارع و الجيران. يومها لازم تتف، تتف كتير أوي، يمكن البصاق يغسلك م العار، أو يغرقه في العار.

طظ فيك، و في (نعيمة)، و في القحف أبو ليّة...

طظ

إتفو

محجوب عبد الدايم

القاهرة 1930.

ملحوظة: الصورة من مدونة (بهيّة). واحدة برقبة أي (نعيمة).

طظية مزدوجة

Fri, 06 Apr 2007 17:13:00 GMT

أنا رجل مهمل

أسوأ عاداتي على الإطلاق. أنا مهمل و كسول. و في الفترة الأخيرة نال كسلي و إهمالي طظياتي الغالية. لست أدري كيف السبيل إلى الإعتذار، و...

طظ

هيهيهي

يقولون أن عاطفة المرء أكثر تعقيدا من تكوينه الإحيائي. قد تختلف معي؛ إلا أني لا أؤمن بتلك المقولة. قد يعزى ذلك إلى دراستى المادية البحتة. أو إلى ميلي الدائم إلى التبسيط أو قل التسطيح. إلا أني أجد عواطفنا لا تختلف كثيرا عن خلايانا و تفاعلاتنا الكيميائية المعقدة أصلاً. غالباً، العاطفة هي تفاعل كيميائي معروف و موثق. ببساطة، واحد زائد واحد يساوي... طبعا اثنين.

ما يجعلهما ثلاثة و أربعة، أو حتى ألفاً في حالة التعامل مع العواطف، هي تلك الآحاد الخفية. الآحاد التي نرفض تماماً مجرد اعتبارها موجودة في التفاعل العاطفي. إلأ أنها رغم أنوفنا جميعاً تضيف الكثير و الكثير، و تغير ناتج التفاعل بشكل درامي.

بينما كنت داخلاً المسجد اليوم لأداء صلاة الجمعة، كان "الإمام" قد اعتلى منبره منذ فترة، ووقف صارخاً بصوته المراهق المعتاد و لغته الركيكة المستفزة، محاولاً أن يقنع نفسه بأنه خطيب مفوًّه. المهم، ما كدت أجلس حتى سمعته يصرخ..

"لماذا تحب رسول الله صلى الله عليه و سلم؟ ... حتى لا تكون منافقا."

هوت الجملة سحيقًا سحيقاً في أعماق عقلي الفارغ من الأفكار في تلك اللحظة، مصدرة دويّاً مفزعاً، و مثيرة الكثير و الكثير من الموجات في سوائلي البروتوبلازمية الساكنة.

بدأ الـ(شيخ) يُنَظِّر لمقولته مستشهداً بالكثير من الآيات و الأحاديث، و مبيناً "فرضية" ذلك الحب و إثم المقصرين فيه. ثم استرسل موضحا كيف أن حب رسول الله صلى الله عليه و سلم هو من شروط الإيمان، و من شروط تذوق حلاوته، إلى آخر ذلك مما ينتهي إليه القول في ذاك المقال.

ثارت في نفسي طوال الخطبة طاقة سالبة عارمة. و شعرت بالغضب الشديد و بالخيبة الثقيلة و أنا لا أستطيع أن أتبين مصدر تلك الطاقة السالبة؛ ذلك الامتعاض و الاستياء الغير مبرر عادة يورثني سحنةً مزرية.

وقفت أصلي شارداً، و يعلم الله فيم كان شرودي. في نهاية الصلاة، هممت أن أتقدم للإمام و أحادثه عم جال بنفسي، و ما شعرت به من كلامه الملقى على نحو عجيب. و بينما تراودني نفسي بهذا، إذ أرى الرجل و قد استدار و جلس ليختم صلاته. تسارعت أحماض معدتي الخاوية إلى حلقى، و علمت ألا أمل أمامي في محادثة هذا الشيء الجالس. كان يبدو مثل الفقمة تماماً، و قد التفت حوله بعض فقمات أخرى تشبهه. هممت بالانصراف مطلقاً الكثير و الكثير من "حسبي الله و نعم الوكيل" التي صارت خليلتي مؤخراً، و التي لا أكاد أطلقها حتى ترتد عائدة إلي مسرعة بلهفة.

و أنا على باب المسجد لاحظت شيخاً طاعناً في السن يتناول مكبر الصوت في ثقة و ثبات و يدعو للإمام باختصار ثم يقول..

"بارك الله في الشيخ الإمام، أردت فقط أن أذكر بشيء يبدو أنه فاتكم. لماذا أحب الناس رسول الله صلى الله عليه و سلم؟ فالرجل لم يملك جنة يهب منها و يمنح. و مع ذلك ما رآه أحد إلا و أحبه، فما بال ذلك؟ المثير ..."

هنا تسمَّرت قدماي في الأرض، و وجدت نفسي اتصلب على باب المسجد واقفاً. استدرت ببطئ و اتكأت على الجدار متابعاً ما يحدث.

" أنه صلى الله عليه و سلم كان يبعث ذلك الشعور في قلب من حوله بأنه الـ(صديق). و ما رآه من أحد إلا و شعر بتلك الصداقة، تلك الروح المألوفة المتآلفة. و كان ذلك لرسول الله صلى الله عليه و سلم دون غيره، لأنه صلى الله عليه و سلم اجتمعت فيه أربعة خصال لم يجتمعن لغيره..."

هنا بدأت الفقمات الجالسة تتملل، ثم بدأوا في الانسحاب من المجلس واحداً تلو الآخر. و أنا أنظر

"سعة العاطفة الإنسانية، و رقي الذوق، و متانة الأخلاق، و طبع الوفاء"

لست أدري ما حل بي ساعتها، غير أني شعرت ببرد على صدري، و كأنه أثر يد. و نظرت حولي فلم أجد أي من الفقمات المدعية في مكانه. ارتسمت على شفتي ابتسامة راضية و أنا أخرج من المسجد بهدوء و أسير متمهلا، و أنا أستمع للرجل في مكبر الصوت و هو يشرح تلك الخصال الواحدة تلو الأخرى بتوسع.

شردت قليلاً، و أنا أقطع الشارع تلو الآخر عائداً إلى المنزل و بدأت أتبين ما كنت أشعر به في المسجد رويدا رويدا.

الواقع، أن الحب لا يفرض. مهما كان المحبوب عظيماً و كريماً. إنه لا ينتزع، و لا يمكن أبداً أن يشعر شخص ما بالإثم لمجرد أنه لا يحب شخصاً/شيئاً آخر. و ما كان رسول الله ليفرض حبه على أحد عنوة، غير أنه صلى الله عليه و سلم ما عرفه أحد إلا و أحبه. حتى من لم يؤمن به و لم يصدقه إلى يومنا هذا، كل ما يحتاج إليه كي يصل إلى قلبك هوه أن "تعرفه".

ثم أنه من السفه أن تخاطب جماعة من الذين آمنوا به و صدقوه و ينظرون إليه كمثل أعلى بذلك الأسلوب المهترئ. إيه يعني، ينحبه يا نخش النار؟ أمال إحنا بنعمل إيه في الجامع يا عم الـشـ...يخ بس؟

ثم أنه كلما طالبنا باتباع سنته صلى الله عليه و سلم، ذكرنا بزوجاتنا و بناتنا، و أهمية إطلاق اللحى و حف الشوارب. و يجرؤ أن يدعي بمنتهى الصفاقة أن معصيتنا لرسول الله صلى الله عليه و سلم اليومية هي غالباً في العبادات. و ماذا عن المعاملات؟ و ماذا عن استشراء الفساد و التزوير و الرشوة و المحسوبية؟ و ماذا عن تفشي الألفاظ النابية و العادات السافلة بين كافة طبقات المجتمع؟ ثم ماذا عن انتشار الخنوع و الخضوع و الاستسلام و الجري خلف لقمة العيش الممسوحة بالذل و الهوان و العار كل يوم، لا يختلف فينا أحد عن أحد، لا رئيس ولا مرؤوس، لا "متدين" ولا "فاسق"؟ ماذا عن كل ذلك و أكثر منه؟ ألم تكن له صلى الله عليه و سلم سنة في هذا؟

ثم بعدها تتساءل عن الفراغ الذي يشعر به الشباب في عالمنا العربي و الإسلامي. و تتعجب لم قد يريدون التحول إلي مضحكي الملك، و هم يقلدون هذا و ذاك بملل و فتور. فرَّغت نموذجهم الخاص، ثم تريد أن تحرمهم أن يتخذوا نماذج أخرى؟ يا شيخ حرام عليك. لا ترحم ولا تخلي رحمة ربنا تنزل؟ سيبهم بقى في حالهم. طالما ما بتساعدهمش، ما تشعرهمش انهم مايسووش. و بلاش بقى وحياة الغاليين تقعد تفكرهم بمجد الإسلام و العروبة و النخوة و المروءة و الكلام اللي مش جايب همه ده. لن تورثهم إلا المزيد من الإحباط و كره الذات. فضلاً، إخرس.

مازالوا فاشلين. و بعد مرور مئة عام، مازالوا فاشلين في الدعوة. مازالوا لا يعرفون كيف يتخاطبون. و مازالوا لا يفقهون المقولة الأشهر "لكل مقام مقال". و الأعجب أنهم يدعون أنفسهم خطباء.

ياخي..

طظ

محجوب عبد الدايم

القاهرة 1930.

اعتصار المواهب، و أشياء أخرى

Sat, 24 Feb 2007 11:17:00 GMT

نبذة عن الشاعر:

وُلِدَ، عاش، مات.

النص:

تعلم العلم و اقرأ تحز فخار النبوه

فالله قال ليحيى خذ الكتاب بقوه

اقعد ف جنب اِسْتِنَيِّلْ عامللي ابن الفتوه؟

و العلم سيبه لأهله يا نطع يابن الجِبِلّه

ماخلاص داسوك بالنعال ايه نزلك م الكُوَّه؟

لو كات علومك بتنفع ماكنت خشيت جُوّه

ماكانش ركبك حصاوي من غير لا دين..لامروه

خليك في حجر الحصاوي ف الخُرْج قاعد اهوه

تتعلفوا جهل و تناحه و سفاله انتا و هوه

متغممين بالكمامه متوكلين ع الهوه

و يقوللي علم و قراءه و فخر قال و نبوه

و فاكرلي نفسه ارسطو اهو ده النخع اللي هوه

كل الامم عم بتضحك من جهل هذي الثلّه

و الأدهى ايه و الأمر عامللي فونط و قله

بيقوللي هعمل كتاب متروس علوم بالجمله

قام جاي ناقل هباب يافرحتي ياحلله

من شغل أهل الفرنجه و اتفرج انتا و هوه

شوف الفضايح شوف الجهل بره و جوه

بيقولوا ف الامثال الصبر ايه يادُهله؟

و كله جايله يوم راح يتحمل ع المُله

يبقى "الرصين" يتسد و يلم شغل الفِلّه

احسن مايوم يتشال يلقى الصحايف فُلّه"

معاني المفردات و التراكيب:

العلم: كائن أسطوري ورد ذكره في أساطير الفرنجة المحتلين.

الجِبِلَّة: الجمع من القوم يقال لهم الجبلة، و هم جبلات. لغة قديمة. حرفت حديثا للتعبير عن اللامبالاة.

الخرج: مصطلح ريفي للتعبير عما يحوي علف البهائم.

المُلة: واحدة المُلَل. تقال للخشب، استعرض و تفلطح.

الشرح:

يناقش الشاعر الأوجه الأكثر إشراقا من التعليم العالي في إحدى أشهر كليات القمة في العالم العربي، و تتجلى رؤية الشاعر القومية الفوق محشية ، إذ ينصح ولي الأمر بالتكوم في كيس زبالة و انتظار العربة الضخمة الشهيرة لتقوم بسحقه توفيراً للمساحة و حفاظاً على البيئة.

يناقش الشاعر الحادثة الأليمة التي ألمت به و بزملائه، حيث وعدوا كتاباً جامعاً لامعاً. و لبسوا مسخاً بشعاً من النقل المحرف.

ينهي الشاعر قصيدته بوجهة نظر تؤخذ عليه، ملؤها اليأس و التواكل. مستعجلا يوم وفاته.

مظاهر الجمال في التعبير:

"ركبك حصاوي" كناية عن صناع القرار، و القيادة السياسية. و فيها تبهيم (عكس التشخيص)، تبرز المعنى و توضحه.

" تتعلفوا جهل و تناحة" استعارة مكنية، حث شبه حشد الدكاترة و صناع القرار بالبهائم و حذف المشبه به و جاء بإحدى صفاته و هي العلف و سر جمالها التهويل. فيها استعارة أخري، حيث شبه الجهل بالعلف، و فيها من التجسيم ما فيها.

"فونط و قلة" مافيهاش حاجة.

التدريبات:

أذكر من النص ما يدل على أن:

الشاعر بتاع فضايح.

العلم ليس صنعة أشباه الرجال.

الشاعر ليس لديه فكرة عن الفلسفة الإغريقية.

هات معنى (يوم)، عكس (متروس)، و جمع (الفضايح) و ضعهم في جملة مفيدة.

أذكر وجه الجمال في قوله " في الخُرج قاعد أهوه".

صفحات من كتاب خارجي سنة 2147.

طظ

محجوب عبد الدايم

القاهرة 1930.

طظية مملة--جداً

Mon, 08 Jan 2007 00:01:00 GMT

اليوم نتحدث عن الكلمات، و علوم المصطلحات، و .. أسمعكم تقولون و الملل و الرتابة. أجل أعرف، لا داعي لتذكيري دائماً، يصيبني النعاس جراء ذلك.

To take shit: تركيب لغوي انجليزي، يستخدمه العوام غالباً بمعني تحمَّل الإهانة في خنوع و ابتلاع الاستهزاء برضا. طبعاً يمكنكم أن تروا كم هي مُعبِّرة و موحية تلك اللفظة، تنطقها بملئ فيك (I ain’t takin’ no SHIT) في امتعاض و تضجر عندما ترفض أن تعامل معاملة سيئة أو بغير مساواة. و تشعرك دائماً بالارتياح كونك أخرجت كل حنقك و غيظك في سبَّة مستترة.

و طبعاً نحن كعرب معروفون بالإباء، و الأنفة، و العزة، و النخوة، و ما إلي ذلك، مما يدفعنا دفعاً ألا نـ(أخذ برازاً) من أحد. أو هكذا يستدعي المنطق، أليس كذلك؟ يعني إحنا لا مؤاخذة جامدين قوي، و مصحصين قوي، و مطقطقين قوي، و الكالّو اللي في قفانا ده من نومة الرصيف، و ساعة الغلط نطرطش زلط، و لحمنا جملي مكندز يعني ما نتاكلش، و ان اتاكلنا عضمنا ركب ما ننقرشش، و ان انقرشنا نشرخ في الزور و ماننبلعش، و الكلام الكبير قوي قوي ده.

يعني مثلاً، كنت أعبر الصالة يوماً و أبي يشاهد أحدى المحطات الفضائية، قوم إيه* صوت سليمان باشا غانم بتاع ليالي الحلمية و لهجته الريفية* أبص ألاجيلكم في الشريط الحلو ده اللي بيبقى ماشي بسرعة تحت دِه .. آه؟؟ أيوه عليكو نور هوه الإس إف إخص بتاعكم دِه، ألاقي اسم الله على مجامكم واحد مصري شحط محط شادد حيله، و هازز طوله و باعت يقول ان التوانسة دول مش عارف لمامة إيه و كلام كده كلاته أباحة، أني جولت في عَجل بالي، إيه الواد السَّوْ دِه؟ دِه عَيِّل ناجص رباية، جتها نيلة اللي عايزة خلف، تيجي تبص و تشوف العيال السَّوْ اللي بيجيبوا لأهلهم اللعنة. و لسة يا مؤمن هاشد حيلي و افتح خاشمي عشان أتمأوز على ربايته و أبص ألاجي واحد من تونس بيرد عليه بألعن م اللي جاله !!!

يوه يوه يوه يوه، جري إيه ياولاد؟ حتى أهل تونس؟ تونس العاجلة الراسية يطلع منها الأباحة دي كٌلاَّتها؟ أنا بجيت واجف فاتح ضبي زي الاهبل، و عمال أبص ع المسخرة و اني مش عارف أسكتهم، دول لو جدامي، و شرف أبويا لكنت جومت على حيلي و نتعت كل واحد منهم جلم يخرم ودانه. والله عال، مافاضلش إلا ماتشات الكورة كمان نعيب في بعض عشانها. جال الأهلي غلب الصفاجسي جال، طيب و فيها إيه يا رباية سَوْ، لما الأهلي يغلب ولا يتغلب، تشتموا بعض على إيه؟

إحم إحم

المهم، الأهلي العملاق، صاحب الصولات و الجولات، يفوز على الصفاقصي، و يصعد لكأس النجوم و المجرات و المجموعات الشمسية في اليابان، اللي كان راحها قبل كده و طلع السادس، يعني لا مؤاخذة الخمس فرق التانيين علِّموا عليه. بس هوه ولا يهمه، لأنه غلب الصفاقصي، و بعدين يروح هناك، يطلع تالت المرة دي، يعني العلامات قلت شويتين. و يرجع الأهلي العملاق بخفي اليابان، و خلص المولد.

فضل إيه؟

فضل أنه الاستاذ التونسي المحترم عمره ما هاينساها أبداً للمصريين الشرفاء اللي تعبوا نفسهم جداً و استخدموا أحدث الوسائل العلمية و التكنولوبية من محمول إلى دش و خلافه علشان يسبوا شعبه بالكامل، و طبعاً برضه المصريين الشرفاء عمرهم ما هاينسوها للبيه بتاع تونس، و مش بعيد في يوم من الأيام نتفرج على حرب البسوس مرة تانية.

عمركم سمعتم عن حرب كده زي حرب البسوس دي في التاريخ العربي بس بين العرب و الروم أو الفرس (قبل الإسلام طبعاً)؟؟ البسوس دي قعدت أربعين سنة، بيقوللك يا سيدي علشان ناقة مش عارف بنت أم إيه ضرعها اتخرم. آه و الله العظيم.

مرة كنت قرأت لـ(ملائط) محادثة لذيذة جداً عن حكاية عقدة الخواجة دي. و ازاي حضراتنا الأفاضل ممكن نـ(ـأخذ برازاً) من أي خواجة مهما كانت جنسيته، مع إننا ممكن نعمل محترمين قوي على اولاد بلدنا، و.. تعرفوا إيه رد فعل الرجل الشرقي المحترم المتدين جداً (مهما كانت الديانة) لما يتهزأ من أي خواجة أو خواجاية؟ بيهزأ نفسه أكتر و أكتر حضراتكم، مش عارف السبب لسه و الله، بس بحاول استنتج، إيه رأيكم؟ يمكن مبدأ بيدي لا بيد عمرو؟ ولا بيلغمط نفسه بالطين علشان ما يحسش بريحة عرقه؟ ولا إيه بالظبط؟

حدث بالفعل..

"سامانثا: لم تريد أن تجلس ملاصقاً لي بعد أن أغلقت الحجرة؟

نادر: سنتضاجع، و لكن لا تخبري أحداً.

سامانثا: *إل أو إل* و لم لا أخبر أحداً؟

نادر: حتى لا نفقد المتعة.

سامانثا: آه، متعة المعصية تعني؟ فهمت.

نادر: ماذا؟

سامانثا: أسمع يا نادر، أنا لا أقصد أن أجرح كبرياءك أو أي شيء، على الإطلاق. فأنت تبدو طيباً. و لكنك مازلت تتحرش بي منذ التقيتلك بأكثر الطرق خرقاً و عتهاً التي قابلتها في حياتي. دعني أهمسها في أذنك إذن " أنت لا تفعلها كما يجب، فاشل".

سامانثا: حاول تغيير أسلوبك يوماً ما، قد تكون محظوظاً.

نادر: *يرتفع حاجباه*

سامانثا: ماذا حل بحاجبيك؟

نادر: ماذا حل بشفتيك؟

سامانثا: ما بالهما؟

نادر: تبدوان كثمار الفاكهة، ناضجتين جداً للأكل *يسيل لعابه*.

سامانثا: اللعنة، ظننتك تفهم، عربي غبي. *تغادر*

نادر: يبدو أنك قد غادرتي، حسناً، فليبارك الله فيكي و فينا جميعاً. اللهم آمين."

أنا لا أتخيل أي شيء ولا أفتري أي شيء، هذه المحادثة الإليكترونية وقعت أمامي بالنص، و يشهد الله على أني حاولت ترجمتها إلي العربية بشكل أحسبه مثالياً. السيد نادر ليس نادراً على الإطلاق، ولا يشكل قلة في المجتمع لا سمح الله، السيد نادر هذا الإنسان المَهين هو هو، يذهب في الصباح إلى عمله متعالياً على كل من يعملون معه، ظاناً أن الله قد منَّ به على الكون، و أنه أفضل من أن تمس الأرض قدميه. السيد نادر قد يقتل نفسه و يبيع والديه من أجل فرصة عمل في الخارج، إلا أنه لا يتكرم ليتابع عمله هنا في بلده بأي وجه، تاركا الغلابة من عباد الله و قد تعطلت حيواتهم بسبب مزاج سعادته.

أعتقد أنه على العرب أن يغيروا التركيب الإنجليزي ليناسب أحوالهم الأسطورية و منطقهم المقلوب، ليصبح (أنا لن آخذ برازاً..محلياًَّ). عقدة الخواجة، حتى هنا !!! ما هذا النقص؟! يعععع ياخي..

طظ !

محجوب عبد الدايم

القاهرة 1930.

طُظِّية مباغتة

Wed, 03 Jan 2007 18:32:00 GMT

اليوم أحدثكم عن الإرهاب. بينما يعلو صوت أبوكم الحاج (عبد الدايم) موبخاً لكل من في البيت، و مهدداً إيانا جميعاً بالطرد من العزبة الرحبة التي نعيش فيها إلى الشوارع الخلفية المظلمة، حيث نجوع و نعرى، و نبقى (رجالة). لمجرد أن أخي الأصغر –طالب بالثانوية العامة- سهر ليلاً يلعب بالحاسوب، فتغيب عن المدرسة و الدروس الخصوصية اليوم. و بينما أنا أتابع الأخبار اليومية المؤلمة، إذ بأحد الأصدقاء يرسل لي منزعجاً جداً، و..

دعوني أخبركم أولا أني لم أعرف (إيمان حسان) قبل اليوم. دعوني أيضاً أخبركم أني لم أكن أتصور إطلاقاً أن ..

عفوا، أجدني مشدوهاً، أجد الكلام الذي طالما كان سيفي، و درعي، و ردائي، و إزاري، و دابتي، و خيمتي لا يسعفني. أجده حائراً متردداً. أجده مصعوقاً مكلوماً. واحسرتاه على كلماتي !

آآه ، إنها تعود.. انتظروا !

المسألة كلها نفسية، تعالوا نتدارس تلك الحالة الغير فريدة بالمرة. أنا أحدثكم عن إرهاب المدونين. ليس القبض على المدونين ما أقصد، بل أعني الإرهاب الفكري. النفسية السلبية، ببساطة حالة (إيمان).

(إيمان) –زي أي مدون- تعودت أن تصف خواطرها المتناثرة كيفما اتفق في مدونتها التي لم أقرأ منها شيئاً بعد. ثم بطريقة أو بأخري، تتعثر (إيمان) بمدونة السيد (كان فين) الذي لن أضيف رابطاً لمدونته، توفيراً لوقت القارئ، و رقياً بالذوق العام للقراء. السيد (كان فين) هو أحد الفارغين عاطفياً، من المعتقدين في سيادة الجنس الفرعوني الطاهر، و أن العرب البرابرة الهمج قد احتلونا، و يجب علينا أن نقاومهم، و نخرج على ثقافتهم (دينهم)، و نصبح فراعنة مرة أخري. منطق مضحك جداً بالطبع.

المهم السيد (كان فين) افتتح مدونته منذ بضعة أشهر، و همه الأكبر أن يفرغ عُقَد نقصه، و غضبه المكبوت من محاولات التحرش الكثيرة التي تعرض لها في صغره، في محاولات مضحكة جداً لإهانة الرسول الكريم صلى الله عليه و سلم. للوهلة الأولى قد تظن أنه يتبع منهجاً علمياً ، أو أنه صاحب حجة، أو حتى صاحب منطق. و لكن في الدقائق القليلة التالية يتبين الواحد أنه إنسان مَهين، غير ذي علم، ولا حجة، مبتغاه السب و القذف مما يدل على البيئة التي تربى بها، و مما لا يشجع أبداّ على الرد عليه أو على أمثاله من غير أولى النهى. و كما يقول الفرنجة " لا تتعارك مع الخنزير أبداً ، فكلاكما يتلوث، إلا أن الخنزير وحده يعجبه ذلك".

و تطالع (إيمان) مدونة هذا المهين الإرهابي، ثم –و بكل بساطة- تستجيب لإرهابه الفكري العنصري. فهو عادة ما يرسل رسالة تحت-واعية إلى القارئ مؤداها أنك إن لم تكن إسلامياً متشدداً مرتداً زياً معيناً و قارئاً لكتب معينة، و ذا أيديولوجية معينة، فإنك تكون مثلي، مُرتدَّاً متعصباً متفسِّخاً و جاهلاً. يالها من رسالة وجدت استجابة واسعة.

(إيمان) الآن بدأت في حذف مدونتها شيئاًُ فشيئاً، و بدأت بالطبع بالتدوينات التي تحمل عطراً رومانسياً، لأنها حرام من جانب في وجهة النظر التي هي على وشك اعتناقها، و لأنه لا يجوز أن نحب و نعشق و رسول الله يسبه هؤلاء المنحطون. هكذا، بمنتهى البساطة ، و بمدوِّن واحد فقط، استطاعوا أن يقتلوا فيها الحياة، و الرغبة في العيش، و الحب، و التعبير عن الذات.

يصبح الأمر أكثر طرافة عندما تعلن إيمان أنها سوف تلتحق بمعهد للدراسات الإسلامية، لكي تستطيع الذود عن رسول الله صلى الله عليه و سلم و دينه الإسلام. و كأن رسول الله صلى الله عليه و سلم و دينه في حاجة إلى دفاع و ذود. و كأن هذه المعاهد التي ضرها أكثر من نفعها، و التي لا تخرج إلا أنصاف دعاة، لا يعون من دينهم إلا القشور، و يظنون في أنفسهم أنهم بمجرد التحاقهم بأحد هذه المعاهد قد أصبحوا شيوخ الإسلام، و الممثلين الرسميين للذات الإلهية، قد ترفع ضراً ، أو تسد ثغراً. و كأن الوسيلة الوحيدة للرد على هؤلاء و أمثالهم هي أن نصبح كلنا شيوخاً و دعاة. و كأن الله لم يقل " و لَوْلا نَفَرَ مِن كُلِ فِرقَةٍ مِنهُم طَائِفَة ".

هذه الاستجابة المفجعة لهذا النوع من الإرهاب الفكري العنصري، الإستجابة إما بإخراجنا من الحياة الدنيا و رفعنا على براويز تعلق على الحوائط لجمالها و قلة نفعها، أو إخراجنا من ثقافتنا و أصلنا، لنتفسَّخ و نتحلل و نثبت أننا لسنا إرهابيين. مثال الأولى (إيمان) و الكثير من حديثي التدين، و مثال الثانية ما كان يحدث في استادات مصر أثناء كأس الأمم الإفريقية من تقليد مهين و مضحك للأزياء و طرق التشجيع التي لا تمت لمجتمعنا و ثقافتنا بأي صلة. و ما زال يحدث على شاشات السينما العربية المشوَّهة، و التي لا تعبر عن مجتمعاتنا بأي شكل !

ثم نتعجب لماذا أتوا لاحتلالنا و نهب ثرواتنا.

" أنتم إما معنا أو علينا " هذه الفرضيَّة الفاسدة التي طرحها السيد (جورج دبليو بوش) منذ عدة أعوام، و التي مازالت نتائجها المقززة تتابع. فنحن إما ضد الإرهاب، و بالتالي حسب الفرضية نصبح أمريكيين قلباً و قالباً، و إما نكون غير أمريكيين، فنحن بالضرورة مع الإرهاب. و أخذنا نتكالب لنثبت أننا لسنا إرهابيين ، و لسنا مع الإرهاب، و أيضا لسنا مع العروبة، و الإسلام، و الهوية، و الخصوصية، و حرية التعبير الفكري بالمرة أيضاً.

يعتقد بعض الفلاسفة أن المادة لا توجد خارج الوعي، ببساطة مالا يعيه عقلك، فهو غير موجود، لأن العالم الذي نعيشه ما هو إلا ترجمة عقولنا له. و بغض النظر عن اتفاقنا أو اختلافنا معهم، إلا أنني أظن أن الوضع الحالي ينطبق تماماً مع نظرية كتلك.

يا سادة، نحن أريد بنا ضَرْب، فانضربنا لمجرد تلك الإرادة. ضُرِبنا فانضربنا، جعلوه فانجعل سيتيويشن.

فلتذهبوا، و لتتغيروا، و لتتشوهوا كما أريد بكم. لتتفيقهوا، و لتتفسخوا، و لتنافقوا. لتتقوقعوا، و لتستتروا، و لتتلاشوا لأنه مافيش فايدة، و من أجل ذلك..

طظ !

محجوب عبد الدايم

القاهرة 1930.

الرضاعة العقلية في ظل يلهوي و يا خرابي

Fri, 15 Dec 2006 04:27:00 GMT

قبل أن تقرأ: الكاتب ذو وجهة نظر و أسلوب دنيويين. أنظر لليمين أولاً. أصحاب المشاعر المرهفة، و مرضى ضغط الدم الشرياني المرتفع، و البول السكري و تصلب الشرايين و البواسير يمتنعون.

مرة المُدرسة سألت تلميذ " تعرف تشاورلي على استراليا على الخريطة" فالتلميذ بكل نباهة راح مشاور على الهند. بصراحة المدرسة اتهبلت قامت مصرَّخة فيه " وله؟؟؟ انتا هتستعبط؟ بقوللك استراليا" الواد بصلها بمنتهى اللامبالاه و شاور تاني علي الهند. الوِلِيَّة (شوف اتحولت من مدرسة لولية، و ده نَص الكلام حسب الراوي) قامت لهفاه قلم على ودانه طلع من يأفوخ والدته. و بعدين بعتته على وكيل الدور. و بعدين...

بصوا عشان ماتكرهونيش زي ماكرهت راوي القصة أنا هحاول اختصر

وكيل الدور>>> المدير>>> مدير المنطقة التعليمية>>> وكيل الوزارة>>>> الوزير>>>> رئيس الوزراء>>> رئيس الجمهورية.

طبعاً الواد اتثبت، رايح يقابل الرَّيس و هوه مش على بعضه. و المهم انه عمل نفس العملة قدام الرًّيس، بس طبعاً بما انه الرًّيس، يعني الحكمة و الرصانة كلها فقرر يحل الموضوع حل "جذري" كعادته الرصينة.

قالُّه" بص يابني..انتا حالتك صعبة خالص. انا بقى هابعتك استراليا دي تشوفها بنفسك عشان بعد كده ماتتلخبطش"

و فعلاً كان قد كلمته (طول عمره و الله) و الواد راح قعد شهرين في استراليا و مشي في الشوارع و عرف كل صغيرة و كبيرة هناك.

و بعدين ركب الطيارة و رجع الى أرض الوطن. و نزل من الطيارة فرحان، و خرج من المطار.

و هوه بيعدي الشارع اللي قدام المطار، جه أتوبيس بسرعة و دهسه !

بس خلاص

ايه؟ نستفيد ايه من القصة؟؟ إيه الغباء ده؟ طبعاً إننا نبص يمين و شمال قبل مانعدي الشارع.

طيب طيب، استنوا بس. ييييه مش قولنا بلاش طماطم مع الجمهور يا (برعي)؟ أهو القميص باظ أهوه..عاجبك؟؟

لا أدري لم تذكرت هذه القصة "الممتعة" و أنا أقرأ هذا الشيء. لعله تطابق الطرح، أو ربما هو تماثل أسلوب تلقى المستمع. المهم، لقد انتشر هذا الموضوع بشكل مؤلم. فيبقى اشمعنى انا لأ يعني؟؟ موضوع إيه؟؟ طبعاً الاستخفاف بعقلية الآخر (الآخر بكل أنواعه).

يعني مثلاً مثلا حكاية الحاج (حسني) و ولده. الحاج (حسني) عنده عزبه كبيرة قوي، بلاش نتكلم جاتله إزاي، المهم إنها عنده. في ناس بتزعم إنهم شركاء معاه و كده، بس هوه مطنِّش خاااالص. و بس علشان الناس ماتعملش هُلليلة، كان دايما يقول ان ابنه مالوش دعوة بالعزبة و حتى مالوش فيها، ولا نفسه رايحالها، لانه ابن بندر، متعلم و بتاع كراسة و قلم، مالوش في الطين و العجين.

و بعدين، نلاقي الحاج (حسني) جايب ابن الــــ.. بندر، و معينه رئيس لجنة سياسات العزبة. فالناس قلقت، قالوا الراجل رجع في كلامه ولا إيه؟ بس الراجل بصراحة عمره ما بيرجع في كلامه أبداً. فيبقى "أكيد" الناس فاهمة غلط.

أمال ايه الصح؟ بيقولك ياسيدي إنه الواد من حقه يشتغل في السياسة "زي أي شاب في مصر". شوفت الكلام اللي ماحدش يقدر يرد عليه؟ هيه دي الديموقراطية بجد. الواد فعلاً "زي أي شاب في مصر".

كان بيروح مدرسة أميرية "زي أي شاب في مصر". كان بياخد مصروف يوازي ربع مرتب والده "زي أي شاب في مصر". كان بيتشعبط في الميكروباصات و هوه رايح الجامعة "زي أي شاب في مصر". كان بيقعد يبل روحه قدام الدكتور في امتحانات الشفوي و مش بعيد الدكتور يسقَّطه غلاسة و اقتدار "زي أي شاب في مصر". لما جه يحب واحدة كانت بنت الجيران، أو زميلته في المدرسة، أو بنت طنط عواطف (خالته) "زي أي شاب في مصر". طبعاً لما كان بيخرج يجيب سندويتشات فول و طعمية كان بيتبهدل "زي أي شاب في مصر". و أكيد لما مرة حاول يطلع جواز سفر أو تأشيرة أو أي مستند حكومي كان بيتسحل أَيْمان أهله برضه "زي أي شاب في مصر". و من الضرورة إنه لما كان بيمشي مخالف أو مش مخالف بالعربية المستعملة اللي اشتراها بالدين و اللي مشارك عليها تلاتة اصحابه، كان أمناء الشرطة بيعلِّموا على قفا اللي جابوه "زي أي شاب في مصر". فمن حقه الدستوري إنه "زي أي شاب في مصر"، تبقاله حياته السياسية "زي أي شاب في مصر"، علشان "زي أي شاب في مصر"، كل الناس لهم حياة سياسية.

شوفتوا؟ نفس بواخة القصة الأولى و التانية. طب بلاش سياسة خالص. تعالوا نروح حتة تانية.

تقعد تتكلم مع أي واحد يظن في نفسه....

عفواً لقد غفوت قليلاً. أحيانا أكون مملاً إلى درجة تصيبني شخصياً بالنعاس الجبري. المهم.... آه

يجي واحد صاحبي و حبيبي و كفاءة، يحكيلي عن شريط سمعه من شيخ لا داعي لذكر اسمه، عن موضوع "رضاع الكبير". أيوه زي ماسمعتوا كده. "شريط" بحاله، بفلوس، و المفروض ناس هتقعد تسمعه مش أقل من ساعة، علشان يعرفوا حكم الدين في "رضاع الكبير". و بعدين حيثية الشيخ المبجل ايه؟ إنه في "بعض المغرضين" بيقعدوا "يسخروا من آيات الله"، و إنه عامل الشريط ده علشان يرد عليهم. ماشي يا عم الأموور، نديها حتة "ولاء و براء" كده و نصدق سعادتك، مش هنظن لا سمح الله انك عامل شريط فرقعة، ولا عشان تلم جمهور و تعمل نجم، ولا عشان تقول للناس إنك شيخ متين في العلم لدرجة انك خلصت كل العلم الشرعي، و مش فاضل غير غريب التاريخ و الفقه تعرفوا للناس (اللي انتا بتسميهم عوام، و المفروض تحجب عنهم الشبهات و الغرائب، لحسن يشكوا في دينهم ولا حاجة). مش هنقول الكلام الفاضي ده كله. تعالى نشوف انتا عملت ايه. قعدت تشرح في الموقف التاريخي الغريب، و طبعاً ماوردش على بالك تشوف الحكمة وراه ولا أي حاجة، لحسن تبقى كافر. و بعدين، قعدت تشرح في تعريف الرضاع، و تجيب من مسألة الأخوة في الرضاعة و تلبس طاقية ده لده، و تُفَسِّق أي شيخ تاني اتكلم في الموضوع غيرك. و بعدين؟ وصلت لأيه؟ حسبي الله و نعم الوكيل ! و كأنه معاه صك الهي يستثنيه من قوله تعالى " الَّذين ضَلَّ سَعْيُهم في الحَيَاةِ الدُّنيَا وَ هُم يَحْسَبُونَ أَنَّهم يُحْسِنُون صُنْعاً" عمال يطبقه على كل الناس ماعدا هوه. تيجي تسأل واحد من الناس اللي بتسمع الشرايط اللي من النوع ده، اتعلمت ايه، و ليه؟ يقوللك ده علم شرعي، و طلبه فريضة. عظيم جداً و الله. فتيجي تسأله مثلاً حضرتك متعلم جنسياً؟ يركبه ميت عفريت و تراه ينظر اليك نظر المغشي عليه من الموت و هو يتعجب و يحسبن في وشك ألف مرة كأنك اغتصبت والدته " و اتعلمه ايه؟ هأستفيد بيه ايه؟" تقوله مش ده نصف الدين يا عم الحاج؟ مش الجوازات بتتخرب من كده برضه؟ و هوه ده السبب الأساسي دائما؟ يقوللك ده كلام فاضي، و الناس زي الفل، و احنا شعب "جامد" قوي (مش عارف جامد دي يعني ايه الصراحة)، و يتهمك انك تريد ان تنشر الفساد في الأرض. تقوله ياعم ربنا يهديك، المس الأرض برجليك كده و شوف الناس عايشة ازاي، الناس هتتعلم الكلام ده كده كده، فلما تعلمهولهم انتا بطريقة تربوية و منهجية صحيحة، و تعلمهم فيها آداب الدين كمان، تبقى أحسن من الكتب الصفراء اللي بيضربوها زي سجاير البانجو قبل الزواج و بعدين يدخلوا ينيلوا الدنيا. يقوللك لما يبقوا يتعلموا النص الأول من دينهم نبقى نعلمهم النص التاني. فعلاً، "رضاع الكبير" و "غريب الأمثال و الأقوال و زلات اللسان التي تجلعنا كفرة دون أن نشعر" أهم من كيفية إنشاء أسرة، و معاملة الزوجة. على فكرة الأمثال كتيرة جداً على حبايبنا الحلوين دول. بس أنا حاسس إنوا الناس زهقت م القراءة عنهم.شوفتوا استخفاف بالعقل اكتر من كده؟

أنا شوفت...

يجي دكتور الجامعة يقعد يكلمك عن العلم و اللي بيتعلموه، و عن الديموقراطية و الأخلاق العلمية. و بعدين تبص تلاقي الخازوق جايلك من غير ماتشوفه يابني..كدهو هووووووب، بالشفا. يسرقك في كتاب مزور و بعدين يقوللك ماليش دعوة بيه، يلعب في نظام الامتحان علشان ابنه يرتب ع الدفعة و انتا تقعد جنب ماما في البيت، يضربك امتحان ما أنزل الله به من سلطان، علشان الدفعة شكلها فرافير و خنافس و لازم يتربوا،يستهبل عليك بمحاضرة لو طَلَّعت عيِّل من ابتدائي هيشرحها بأسلوب أكثر امتاعاً. كده يعني، و كل سنة يتفوق على نفسه، و يخترع حاجة جديدة، و طبعاً حجة جديدة، و كله بالقانون و اللايحة و الشرع و الأصول. و انتا المفروض توافق و تقبل و تسيبه يهين عقلك بحججه القذرة. العادة تحكم بقى.

ده لسة كتيــــــــــــــــــــــــــــــــــــــــر!! القايمة مابتخلصش. كله بيسخر من عقلك، و .. عارفين إعلانات الشراء عبر التلفزيون، و حكاية اشتري المستحضر الفلاني و احنا نبعتلك عيِّل هدية فوق البيعة و لو ماشتريتش تبقى كافر علشان انتا كده مش مؤمن بآية القرآن اللي انا حشرتهالك في أول الإعلان؟

و الله أنا معبِّي ع الآخر، و كل ماجي أطظكم بقى علشان تقوموا تمشوا، ماقدرش.

يللا بقى

طظ !

محجوب عبد الدايم

القاهرة 1930.

ملحوظة (يللا مانا بقيت بتاع ملاحيظ): المدون المحترم صاحب المدونة بالرابط، أتمنى لك حظاً موفوراً في المرات القادمة، لا شيء شخصي هنا، احببت أن أوضح بعض النقاط فقط. شكراً.

نظرية السلَّم، المقدمات و النتائج، و القرع

Fri, 08 Dec 2006 10:53:00 GMT

هل رأيتم هذا؟

لا أعرف، لقد صدمت بشدة يوم ان تعثرت بهذا الموقع بالصدفة البحتة. كنت اتجادل مع أحد الـ(فرنجة)، همممم لم أكن أتجادل حقاً. كنت فقد "أتجاذب أطراف الحوار معه". هو شخصية مثيرة للاهتمام بشدة. يعتمد دائماً اسلوب الصدمة و الرعب (shock and awe) في اجتذاب الانتباه، و هو المثال الأكثر بروزاً لنجاح هذا الأسلوب في نظري على الأقل. هو من أراني النظرية، و أخذ يشرحها مراراً و تكراراً.

في المرة الأولى التي قرأت فيها عن (نظرية السلَّم)، كنت غاضباً تماماً. المشكلة أن صاحب النظرية كان سكراناً إلى حد التطوح، باعترافه شخصياً. كما أنه بدا معبئاً بالمرارة حتى أذنيه.

قد تشعرون بمثل ما شعرت به. لكن هل جربتم مقارنة فرضيات النظرية بالواقع الذي نعيشه في عالمنا؟ دعونا لا نحاول تطبيق ذلك على عوالم لم نرها. لنركز على عالمنا العربي الرائع.

للأسف، النظرية مكتوبة بالانجليزية، ولا يوجد ترجمات لا جيدة ولا غير جيدة للنص الأصلي. عليكم ان تتحملوا معي.

همممم؟ ما رأيكم ، دام فضلكم؟؟

قد تتفقون مع هذا المسطول، و قد تختلفون. و لكن النتيجة في مجتمع كمجتمعنا ستكون دائماً...

طظ !

محجوب عبد الدايم

القاهرة 1930 .

في الرجال الذين لم يعودوا كذلك

Wed, 06 Dec 2006 17:41:00 GMT

أجمل شيء في دورات التربية العسكرية الصحبة. الّلمُّة دي.. عارفين كده شلة عيال من الممكن تشوفوا فيها كل الوان الطيف بتاع المجتمع الأمور بتاعنا. و حلاوتها انها على عكس الجيش، ماحدش بيتعتق منها، حتى المكسًّحين.

كنا نتكوم اليوم في أحد أركان الساحة التي ندرس بها. آه بالمناسبة، نحن ندرس داخل الحرم الجامعي، أمام الطلبة الآخرين (على عينك يا تاجر كده، و صفا و انتباه و عاملين قلق يعني). تجمعنا في إحدى فترات الراحة بجوار المجند المسئول عن تدريبنا. و لم نكد نفعل حتى انتشرت رائحة التبغ البغيضة تسد الخياشيم. و بينما نحن نهزر كالعادة، إذ بالمجند يشهر هاتفه المحمول كأنه سيف بتار، و يبدأ في اجراء اتصال هاتفي. نظرنا إلى بعضنا البعض نظرة ذات مغزى، ثم اندفع أحدنا ساخراً مقلداً صوت المجند القائد بتهدج " أيوة يا حبيبتي، أنا بدرب الجنود اللي تحت ايدي، اصل انا القائد و كده يعني، انتي عاملة إيه؟". لاحظتُ تلون وجه القائد على الفور، فوكزت هذا الساخر ليكف عن احراج الرجل (عادة منيلة بنيلة، مابحبش احرج حد، حتى في الهزار). إلا أن القائد نظر الينا و قال بغير اكتراث –أو هكذا حاول أن يبدو- " أنا ماتصلش ببنات، هما اللي يتصلوا بيا معلش".

بدا التعجب على وجوهنا جميعاً، و عاد الساخر يسأل في حيرة "هوه كده تبقى رجولة؟ يعني تخليها تصرف عليك مكالمات بالقصد؟؟". لم يكد ينتهي حتى انبرى آخر مدافعاً عن موقف القائد " دي الرجولة انه ياخد منها فلوس". هنا كان وقع الصدمة علينا ثقيلاً. و بدا هذا المدافع وغداً الى اقصى الحدود، حتى أن وجهه استحال الى منظر يشبه كثيراً فردة الشبشب المقلوبة. عاد الساخر يسأل من جديد "يعني حضرتك هترضي مراتك تصرف عليك مثلاً؟" هنا انفتح ثقب في فردة الشبشب المقلوبة، قد يظنه البعض فماً، إلا ان ما خرج منه لم يكن كلاماً. كان شيئاً بلا معنى، غير أنه كان قذراً جداً " لا مراتي حاجة تانية، انما دول بنات تمشي معاهم كده تضييع وقت".

هنا لم أقدر ان العب دور المتفرج. و سألته بصوت حاولت جاهداً أن يخرج هادئاً، إذ انني كنت أغلي من الداخل " احم.. هوه الرجولة انك تمشي مع البنات تضييع وقت، و بعدين يعني ايه تضييع وقت دي؟ ثم انه هيَّه هيَّاها، لو هترضى تعيش نَطْع مرة، هترضى تعيش نَطْع طول عمرك". بدأ يبرطم بكلام غير مفهوم و قد أيقن أنه تحت حصار مشدد من النظرات. قال شيئاً بمعنى "كلامك ده قصر ديل يا ازعر" ثم انطلق هاربأً إلى الكافيتيريا.

تلفتُّ حولي لأجد (ايمن) و (رزق). (ايمن) بالغ الطول، و كل شيء فيه تقريباً يشبه المستطيل، عدا شفته العليا المنفرجة دائماً. أما (رزق) فيبدو مثلثاً ، بشعره الخفيف و عينيه الزرقاوتين الخبيثتين. سألت" هوه إيه حكاية شرف البنت زي عود الكبريت دي يا جماعة؟" فنظرا لي في استفسار. بدأت اتابع " هما الرجالة مالهومش شرف؟ يعني الراجل مننا يلف و يدور و يعُك زي ماهوه عايز، و بعدين ماحدش يقولّه حاجة. و لو حد حاول يستفسر منه يبقى (أزعر)؟ بمناسبة ايه ان شاء الله؟ هوه الرجالة بقت رخيصة للدرجة دي؟ شرفنا بقى ولاّعة؟"

تردد (ايمن) قليلاً قبل أن يجيب" لا لا انتا دلوقت بتخلط الأوراق. البنت لازم تحافظ على شرفها اكتر من الراجل ألف مرة.." قاطعته سريعاً " ليه؟؟ و الولد ما يحافظش على شرفه بالجامد قوي كده ليه؟" هنا تدخل (رزق) بخبثه المعهود و ضحكته الشريرة " الراجل راجل برضه". ارتسمت على طرف شفتيَّ ابتسامة سريعة و خبيثة و انا اقول" بأيه؟ الراجل راجل بأيه يا (رزق) بالبتاع؟" و اشرت بيدي اشارة ذات مغزي، انفجر لها الحضور ضحكاً. إلا أنني تابعت" لا بجد يعني. ماحدش يفسرلي الحكاية دي؟" لم يحر أحدهم جواباً، فاتنهزت الفرصة لأفرغ شحنتي كاملة، قبل أن تتفتُّق قريحة أحدهم عن نكتة جديدة.

" طب بلاش دي. اشمعني الولد ممكن يقعد يبحلق في البنت يجي نص ساعة، لغاية ما يزهق م البحلقة، و ماحدش يقوله انتا بتعمل ايه، و لو البنت عينها جت في عين ولد و لو حتى بالصدفة ، تبقى صايعة و قليلة الادب، و (بتراوده عن نفسه)؟ بلاش دي و دي، شوفتوا النص عيِّل اللي كان واقف قارفنا بسجايره و هوه بيقسِّم البنات لنوعين كأنه في حصة أحياء. بنات (للمشي)، و بنات للجواز. طب اشمعنى الصبيان كمان مش كده، و لا الصبيان كلهم بتوع (مشي) و كده يبقى مافيش فرصة للبنت تختار، كده كده هتتجوز واحد كان مشاية قبل كده. مش ده يبقى ازدواج معايير، من اللي احنا بتشتكي من امريكا بسببه؟؟"

و كما توقعت، تفتَّقت قريحة عمنا (ايمن) عن " هيهيهيهي، الله ! جرى إيه؟ انتا بقيت من بتوع (سوزان مبارك) و حقوق المرأة ولا ايه؟؟" و الله لو مكانش جاب سيرة (ماما شوزان) كنت كبسته. ووجدت نفسي أجيب " بص يا (ايمن) انا مش بتاع حد، بس انا ما بحبش اشوف الغلط و اقف على جنب اتفرج. باتأثر صحياً. و بعدين تعالى اقولك كلام ربنا، ربنا أمر الراجل و الست بنفس الحاجات، اشمعنى بنشد قوي كده ع الست، و نقعد نمط في النص عشان نحملها فوق الطاقة،و نقعد نغطيها و نخبيها و نتهمها في كل لفتة و نفس تتنفسه، و لما نيجي عند الحتة بتاعت الراجل، نعديها كده بسرعة في الخباثة، كأننا مش محتاجين يعني، أنقياء بالفطرة ياخيّ؟؟؟ نقوم نيجي ع الاوامر دي، و نقول ايوه ايوه، ماحنا عارفين. طب تحب اعرفك؟؟"

نظر لي في استغراب" ايه؟" توجهت بالحديث الى (عبد الواحد) احد المتدربين معنا " قوللي يا (عُبَد) تعرف ايه عن حقوق الزوج على الزوجة في الإسلام؟" تهلل وجهه و هوه يجيب " طبعاً؛ انها تخدم جوزها، و تشوف طلباته، و تربي عياله" نظرت لـ(ايمن) في انتصار" شوفت؟ عينة عشوائية اهيه. اللي حضرتك ما تعرفوش بقى ان الكلام ده ليس له أي أصل شرعي".

بدت عليه إمارات الدهشة و أنا أتابع " حضرتك ملتزم شرعاً قدام مراتك انك؛ تأكلها، و تشربها، و تكسيها، و تسكنها، و تفسحها، و تلاعبها، و تدلعها، و تشيل عنها الهم، و تخليها تزور اهلها. م الآخر كده حضرتك خدام الست، و ده بأمر مباشر من فوق" و أشرت باصبعي الي السماء.

اتسعت عيناه عن آخرهما و هوه يصرخ " خدااام؟؟؟؟؟" اجبته" أيوه خدام، أمال انتا فاكر (قوامون على النساء) دي ايه؟ شرف ولاّ رتبه؟؟ ده أمر مباشر بالخدمة، بس لأن ربنا عارف العنجهية اللي الرجالة ميقدروش يستغنوا عنها، قام حطها بالأسلوب القرآني المهذب ده. قام يقوم قياما و قوامة يعني حفظ و صان، يعني واقف كده زنهار يشوف خدمات المقام عليه. و بعدين يفضَّلك بمناسبة إيه؟ وشَّك ما يسرِّش عدو ولا حبيب، جسمك مليان شعر و عامل شبه القردة العليا، صوابعك تخينة و مجعلصة، و دايما ريحتها سجاير. ضوافرك دايما وسخة. ريحة عرقك زنخة. و بلاش اتكلم عن رجليك. قوللي إيه حلو فيك عشان ربنا يعملك مخلوق أسمى؟ عارف عقد الزواج الشرعي الإسلامي بيلزم الزوجة بأيه؟ هما تلات حاجات مافيش غيرهم. تحفظ سرك، ولا تدخل أحد بيتك بدون اذنك ، و تمكنك من نفسها..العلاقة الزوجية يعني. بس خلاص. حضرتك ملزم تجيبلها خدامين و طباخين و غسالين حتى. و مع ذلك، كرم أخلاق منها يعني، و عشان هيه فاهمة ان الزواج تعاون و كده، و يمكن عشان برضه بتحبك يا سيادة الدُّهُل. بتيجي على نفسها و تستحمل قرفك و تقعد تطبخلك و تغسلك هدومك...يلهوي..انتا عارف يعني إيه حد يغسل هدوم حد؟؟ مش احنا اصحاب أهوه؟ ترضي تغسللي هدومي؟ ده الغسيل ده لوحده معروف، تفضل مطاطي عشانه طول عمرك. و بعدين تيجي حضرتك بمنتهى العنجهية تقوللي بنات للمشي و بنات للجواز، كأنك حاجة كده فوق البشر. مخلوق درجة اولى. جتنا نيلة في خيبتنا".

أذكر الشيخ (صبري عبد الرؤوف) و هو شيخ جليل، أكن له معزة خاصة، أذكره على إحدي الفضائيات يتحامل بشدة علي النساء في مسألة الزنا و إثبات النسب. أنا أفهم وجهة نظره تماماً، من حيث أن قضايا إثبات النسب بدون عقد زواج قد تلغي الشرط الأسطوري لإثبات حوادث الزنا (حكاية الاربع شهود)، و بالتالي يتحول الحد التخويفي الى حد غير تخويفي. و طبعاً دي تبقى مصيبة سوده. أنا عازره و عازر انفعاله، لكن برضه الحق حق. الرجالة دول مش بريالة، أي واحدة تشاورلهم يروحوا يجروا بالمشوار عشان يعصوا ربنا معاها و بعدين حتى مانلومهمش. و الله يعني و لو إن الرجالة بتتبهط ع النسوان بسهولة برضه (خللو بالكم يا بنات م الملحوظة دي). لكن ده لا يعفيهم من العقاب، و الخزي.

ع العموم ممكن تطنشوا الكلام ده خالص. يعني البنت يفضل شرفها زي عود الكبريت، و الراجل يمشي بولاّعة. بس أُمَّة رجالتها من غير شرف يخافوا عليه، من غير سمعة يحافظوا عليها، ماتبقاش تشتكي لما تاخد على دماغ اللي جابوها بالصُّرَم.

و كالعادة أكيد يعني...

طظ !

محجوب عبد الدايم

القاهرة 1930.

مع الاعتذار للرائع دائماً د.(أحمد خالد توفيق). دي مش سرقة، ده اقتباس.

لأنهم ليسوا من الغنم يا ميدو

Sat, 02 Dec 2006 16:24:00 GMT

(ميدو) جاي مصر يا جدعان...

أيوه بجد و الله، (ميدو) جاي!! إيه؟ مين (ميدو)؟؟ (ميدو) يا راجل!! إهّيــــه!! (ميدو) اللي بيمشي في الشارع. دهوه، أيوه هوه ده.

أرسل لي يخبرني أنه قادم في نهاية الشهر. (ميدو) و أنا لم نتحدث منذ زمن، ايـــه لقد افتقدت الفتى حقاً. (ميدو) مهندس مصري شحط محط (سلام مربع يا جدع)، يعمل بالإمارات العربية المتحدة. تعرفته منذ عام تقريباّ، و أحببت فيه بساطته، و خفة دمّه، و شوقه المرضي لأم الدنيا.

(قعدنا) امبارح نتكلم طول الليل، و بعدين سألته عن رأيه في آخرالأحداث بلبنان الحبيب( بالمناسبة (جوجل) بقاله يومين أهوه ما جابش سيرة، و دي حاجة غريبة جداً). بصراحة اتصدمت..

لقيته عمال يقوللي كلام عجيب عن ازاي انهم "مش إيد واحدة"، و "قلبهم مش على قلب بعض".

فكرت قليلاً، ثم آثرت الصمت. لم أرد أن أفسد فرحته بالعودة. و بيني و بينكم أنا اتثبِّت، أصله بعدها على طول سألني على مصر و كده. قلتله "مصر يابني عايشة في الفُقَّاعة". لم أفهم لم أخذ يضحك بعدها طويلا كأنه يشاهد إعلان مسحوق غسيل.

ما يحدث في لبنان هذه الأيام لا يدل على "إنهم مش إيد واحدة"، ليس في رأيي على الأقل. اعتقد أنهم فقط اختاروا ألا يكونوا غَنَماً. هذا ما في الأمر، هم تخلوا عن حقهم في أن يكونوا غَنَماً في مقابل حقهم في أن يكونوا (بنى آدمين). في لبنان، ما بيربطوش الحمار مطرح ما يعوز صاحبه، ببساطة لأنهم عرفوا انهم كلهم شركاء في الحمار. الحمار بتاعنا كلنا يا جماعة!

في لبنان، ما بيتحرشوش بالصحفيات في المظاهرات، و مافيش عربيات أمن دولة تلم المتظاهرين زي الفراخ، و كمان مافيش عربيات مطافي ترش عليهم ميه كأنهم عيال بتلعب كورة في الحارة و عاملين دوشة. (عربيات المطافي دي دايما بتفكرني بواحدة اسمها (أم ميمي) أخبركم عنها لاحقاً) بس في لبنان برضه ما بيكسروش المحلات، ولا بيقلبوا العربيات، ولا بيسبُّوا بالدين.

اللي بيحصل في لبنان النهارده...ولاّ استنوا

إن مايحدث في لبنان لحظة كتابة هذه السطور (شوفتوا الحتة دي؟)، لم تشهده أي دولة من دول الشرق الأوسط (الكبير قوي). و إنني لمشدوه (أيوه و النعمة مشدوه بجد، و حياة الأُخُوَّة على رأي (ملائط)) للمشهد الحضاري الجاري في شوارع (بيروت). و بغض النظر عن اتجاهاتي السياسية، أو اتجاهاتهم السياسية، فأنا لا أملك إلا ان أقف احتراماً لهذا الشعب الذي سبق جميع شعوب المنطقة في النضج العقلي، و فهم الحريات المدنية. خللي اللي قلبهم على قلب بعض يوروني هما عملوا إيه. انتوا يا جماعة، يا بتوع الإيد الواحدة، أيوه انتوا. عندكوا معارضة؟ طب عندكوا مجلس شعب ..شغًّال يعني؟ عندكوا حكومة بتمثلكوا انتوا؟ طب بتعرفوا تتظاهروا؟ عمركم اتجمعتم بالأعداد ديه من غير ماتحرقوا البلد؟ جتها خيبة اللي عايزة خَلَف!

و إيــه الموقف العربي العظيم ده؟ إيه ياخويا الاتحاد ده؟ دانا عمري (أنا عجوز خدو بالكم) ماشوفت القادة العرب متحدين زي النهاردة. بقوا عاملين زي البط، بيمشوا كده في طابور زي الشطَّار. هش يمين يتهشوا، هش شمال، يتنيلوا يتهشوا برضه، و كاك كاك كاك، طول النهار، وصلات من الوكوكة المتشابهة عاملة زي وصلات الردح الشرقي بتاعت الأفلام الأبيض واسود، الواحد جاله صداع.

و بعدين ما وجه الاعتراض بتاع سيادتهم؟ أليست هذه الديموقراطية و ممارسة الحقوق المدنية في أرقي مستوياتها؟ ده حتى (ماما أمريكا) زعلانة. و بعدين طبيعي جداً إن الشعوب الزهقانة، القرفانة، اللي زي حالاتنا هنا فى الـ(منتئة) تبقى المعارضة بتاعتها من طراز (حزب الله) و (أمل) و الناس دي. عادي جداً يعني. بس بما أن الديموقراطية اللي ماشية اليومين دول عُورَه (عوراء يعني، بعين واحدة)، يبقى ماينفعش نسيب الأنواع دي من المعارضة تتنفس خالص. ببساطة علشان النوع ده من الديموقراطية هوه اللي جاب عمِّنا (هتلر) الأمُّووور للحكم. وجه الاعتراض إذاً يا سادة إن: الشعوب القرفانة تاخد بالجزمة لحد ما وِشَّهَا يتفرد كده و يبقى (بشوش). لكن تسيبهم يقعدوا يعملوا معارضة، و أغلبيَّة، و أقلِّية،و ديموقراطية، و حوار، و الكلام الفاضي ده؟ تبقى بتستهبل.

إلى كل اللبنانيين الشرفاء، تظاهروا أو لا تتظاهروا، و لكن استمروا في ضرب الأمثال لشعوب ماتت عقولها قديما، فماتت أرواحها لاحقاً. استمروا في ضرب المثل لكل من يسبح في الـ(كَنَكَة) ظاناً أنها المحيط، لكل من يزعم الريادة و القيادة، و لكل من يتحدث عن الـ(عراقة) و الـ(عبق). و الله أنا خايف أحسدكم.

و إلي أبطال سباحة الـ(كَنَكَة)، و عشاق تأليه الذات، و عُبَّاد الماضي السحيق. إلى كل المُدُّعين، و الـ(مهلفطين) أحب اقوللكم..

طظ !

توقيع

محجوب عبد الدايم

القاهرة 1930.

ملحوظة: ألف مبروك لـ(ميدو)، أصله بقى على وش جواز و هفرح فيه قريب إن شاء الله. يارب يا (ميدو) كل عيالك يطلعوا أمامير كده زيك. و يارب يطلعوا كلهم مابيربطوش الحمار مطرح مايعوز صاحبه.

ملحوظة كمان عشان خاطر الحبايب: الأيد الواحدة عمرها ما عملت ولا هتعمل حاجة أبداً