fnoon

المرآة المنعكسة

Wed, 09 May 2007 03:01:00 GMT

تركن لدي منذ أشهر ألقيت نظره فقط على البداية

ثم انشغلت فلم أكملها

بالأمس قرأتها كامله

مع الحماس ما نمت الا الساعه 8 الصبح

الرواية حلوه بصراحه

تفاعلت مع الشخصيات كثيراً

هادفه / واضحه / تصور الواقع بمعاني راقية

من أراد الاطلاع على جزء من الروايه وهو منشور على النت

http://saraalzamil.jeeran.com/archive/2007/1/141245.html

الله يوفق جميع من يحمل هم الاسلام

همسه :

الله يسامحك يا ساره نزلت دموعي غصب مع التفاعل

و إذا قرأتي الموضوع الله لا يهينك ردي على السؤال

هل فيه مشروع رواية جايه أو لا ؟؟!!

إذا الجواب نعم لو سمحتي نسخه على البريد المسجل فيها توقيعك = = = >> أستهبل معاك بجد يسعدني أن أرى لك مؤلفات جديدة

بالتوفيق يا رب

ما أدري وش أقول ؟؟!!!

Mon, 16 Apr 2007 15:10:00 GMT

أتابع برنامج على الهواء مباشرة

بر الأمان على قناة المجد الفضائية

الساعه التاسعه والنصف بتوقيت مكة المكرمة

كان قبل الساعه 9

البرنامج رائع وراقي جداً

اتصال هاتفي

سألت المتصلة عن أمر ما

انتهت من السؤال

تقول لــ الدكتور لحظه

المشاهدين والدكتورين على ما يبدو يظنون

أنها ستسال عن أمر آخر

وش قالت !!!!

أقول لـــ ( حنان ال.... وحده

تعرفها ما أدري من هي ) ..أنا كلمت التويجري

و أنتي ما كلمتيه

وطبعاً طوووووط

الحمد لله

القناة الحلوه

قطعت الاتصال

ولا ما أدري وش بتقول بعد!!!؟؟؟

البنت شكلها بصراحه مراهقة

لكن بجد هالأشكال كيف أهلها يسمحون لها بالاتصال عشان شي تافه!!!!؟؟؟؟

وما ودي أحلف إنه تحدي بينها وبين البنت الثانيه أو إنها تبغى تقهرها هو السبب الرئيسي للاتصال

وإن حدث يعني لازم تقول على الهوا إنها معجبه حظرتها هي و اللي ما أدري من تكون معجبات بــ شخص كبر أبوهم و متزوج و عياله أكبر منهم

و الموقف هذا يتكرر كثير في

الفضائيات على حد علمي لكن أول مره أشوف موقف أمامي على الهواء

وفي قناة راقية

الأمر على ما يبدو ظاهره

والله إني منقهره من الموقف البايخ ليه العالم تفكيرها كذا !!!؟؟

ما ادري وش أقول عنهم بصراحه

لكن ما أقول إلا الله يهديهم

يا ليت نوصل لليوم اللي يكون فيه الشعب كله بتفكير راقي

فيه ناس تفكيرها راقي لكن الفكر اللي من هالشاكله من بنات و شباب برضوا كثير

فكرها واعي بصراحه هالإنسانة

Thu, 12 Apr 2007 23:12:00 GMT

قبل عدة أيام كنت أتحدث مع إحدى الزميلات عن مجالات الوظائف وما إلى ذلك فتطرق الحديث بطبيعة الحال لأماكن عده ومن ضمنها أحد الأماكن المعروفه لا أود ذكره لأسباب خاصه

المهم مديرة المكان واعية وأفكارها جميلة و يعجبني بعضها كثيراً

منها

تطوير الفتاة السعودية قدر المستطاع

المكان لا توجد به موظفه أجنبية جميعهن سعوديات

يعطيها العافية بقوه يا ليت كل المدراء مثلها

زميلتي تقول ( غصب بتطلع السعوديات فوق ما تبغى أجانب

و إنها تقول بناتنا وش ناقصهم)

قلت لها بصراحه أفضل لأننا بنات البلد و الأولوية لنا بالطبع

هم في بلدهم لا يوظفون أجانب

لما البعض يفضلهم !!!!!!!؟؟؟

و بعيداً عن هذا وذاك ما هي هذه الوظيفة التي لا تتطلب إلا أجنبية ؟؟!!!

بنات السعودية الآن كلن لها ميولها و تريد أن تثبت قدراتها كلن حسب مجاله

و أحسب الشباب كذلك بإذن الله

وإن شاء الله يرتقون بهذا البلد و لا نحتاج أجانب أبداً

أسال الله العلي القدير أن يوفق الجميع لخير الدنيا والآخره

معرض فاشل

Fri, 23 Mar 2007 01:46:00 GMT

لما أسمع عن معرض تقني أتحمس أروح له بصراحه لكن من جد صدمه معرض الاتصالات و تقنية المعلومات و تجهيزات المكاتب اللي كان في معارض الظهران الدوليه

اللي يقهر أكثر إنهم يقولون مصنف من حيث الأهميه بعد جايتكس

لما رحت قلت إن شاء الله يكفيني الوقت قبل لايخلص وقته

كان باقي ساعتين ونص

لكن لما دخلت اتفاجأت كم محل يوزعون إعلاناتهم يعني شغل تسويق درجه أولى

طيب معرض تقني المفروض على الأقل يعرضون منتجات ما فيه الا شركة أولومبوس تعرض بعض منتجاتها و أطلس وتبع بعض الظاهر بس و الباقي توزيع أوراق والسلام

قاعه المعارض نصها مغلق ما فيه محلات جايه

النصف الثاني محتله نصه أو أكثر شركة الاتصالات السعوديه لأنها نقلت نفس منصتها اللي في جايتكس دبي للمعرض

و شركة

طبعاً لما بتسال عن أي جوال ما حولك أحد الظاهر حاطينها ديكور فقط

شركة برافوا

و الباقي كلها شغل تسويق

و إن كان هناك مبيعات فيهم فهو شي ليس بالأهميه

بالله هذا معرض

أنا أصنفه من أفشل المعارض بصراحه ما عمري رحت معرض وصار كذا

يعني رحت معرض تقني قبل كذا وكان تنظيم لا باس به صح ماكان كبير بس استفدنا منه هذا ولا شي

الا إذا أحد يبغى الاتصالات السعوديه يردون عليه مباشره فهم موجودين هناك

نهاية المعرض كانت أمس

أتمنى مره ثانيه إذا سووا معرض يكون أرقى من كذا وأحسن

ملاحظه وأنا أضيع وقت خلصته في نص ساعه تقريباً

مع العلم إن نصهاعند شركة الاتصالات

الى متى هذا حال DSL عندنا

Tue, 06 Mar 2007 00:47:00 GMT

السلام عليكم ورحمة الله وبركاته

اليوم جايه و أنا واصله معاي من الخدمه الزفت حقتهم

من يوم ما عرفت الخدمه وهي مشاكل× مشاكل ما تخلص

صح حالنا أفضل من الدايل آب لكن مو بكثير عادي ممكن أدخل يوم تكون الخدمه معطله أو فيه صيانه على السيرفر مع إني هذي عجرت أصدقها

لأنها بعد الصيانه على كلامهم ما أشوف شي تعدل

والأدهى من هذا وذاك ما فيه أحد يقول لك إنها مثلا بتتوقف الوقت الفلاني قبل

لا مباشره وأنت عليه فجأه ما فيه اتصال و لو كان عندك شي مهم عادي خل أشغالك كلها تتعطل ):

تتصل على مزود الخدمه يقولون من شركة الاتصالات

تتصل على الاتصالات يقول لك من مزود الخدمه

لما تعصب وتوصل معاك يقولون لك المشكله في مدينة الملك عبدالعزيز!!!! طبعاً هذي وين توصل

لهم وحتى لو وصلت ما ظنيت فيه نتيجه

طيب لين متى هذا الحال ؟؟!!! يعني كم صار لنا من سنه ما تعدلت الخدمه العالم تتعدل !!!!؟؟؟؟

وإحنا الخدمه كل ما لها وتردى

أذكر في أول ما اشتركت كانت أوكي

لأن العالم المشتركين قليل طيب كثروا العالم زيدوا عدد السيرفرات

آخر شيء قبل الاجازه ومشكله البطئ الغير طبيعي

طبعاً الاتصالات تقول اسبوعين إن شاء الله وتتعدل

لكن

إلى يومكم ما أشوف شيء تعدل

و أنا أكتب هذا المقال ادري إني بردد يا ليل ما أطولك

و محد حولي وكل شي

لكن من باب التنفيس عن ما في خاطري و مشاركة القراء هذا الهم ؟؟؟

مع تمنياتي إنهم يتعدلون في جميع الخدمات

ما أقول الا الله يهديهم

Sat, 20 Jan 2007 00:44:00 GMT

السلام عليكم ورحمة الله وبركاته

السالفه وما فيها إني رحت الخميس للراشد المهم زحمه مرررره و تجمع على النص و أصوات وحاله أحسب فيه شي خطير..

أنا داخل المجمع و أخوي تركني شوي وراح يشوف محل وبيرجع لي

قلت بلقي نظره إذا فيه شي خطر ولا شي يمين يسار بطلع برا المجمع وأدق على أخوي يجي لي هناك

المهم يوم ألقيت نظره إلا أنواع التصفيق والتصفير

تتوقعون ليه ؟؟!!

الجمهره هذي كلها طلعت المجمع مشغل النافوره ويطلع شعار مجمع الراشد ملون

طيب عاجبكم ما قلنا شي منبسطين من حقكم لكن ما تسوون هالسخافات

ولا كل واحد مبسوط على حاله واحد بعد كذا يقول شكرا (مصدق مصفقين له ) و الثاني يقول أنا اللي مشغلها لكم

عيب والله عيب يعني هذا تفكيرهم

اللي قاهرني عددهم كبير

كل واحد راز الوجه من صباح الله خير

الى نهاية اليوم دوام هو ولا كيف ؟؟!!

لو دوامه الرسمي ما أتوقع يداوم فيه كذا حتى إذا قالوا له خارج دوام

ما تشوف الا كل واحد داخل باللاب حقه ولا الجريده و رايح المقهى ومعاد يتحرك (طبعاً الهدف معروف ليراقب كل شارده ووارده ) الظاهر دافع للمقهى اشتراك الطاوله محجوزه له طوال العام !!

طبعاً إذا ألقى نظره على اللي في يده كويس أحس بس شغل تمويه و إذا اللاب معاه يدور بلتوث مفتوح وحركات ما ادري وش تبي

طيب أذن الظهر والعصر وووو ما تحرك ليه إن شاء الله ؟؟!! مجنون مرفوع عنه القلم !!

من جد قهر إن فئه من شبابنا هذي اهتماماتهم وهذا تفكيرهم

وما أقول الا الله يهديهم

وإن شاء الله ربي يصلح الحال

كأنهم يدفعون من جيبهم

Wed, 17 Jan 2007 02:08:00 GMT

بدخل في الموضوع مباشره

الدوله الله يحفظها حطت مكافآت للطلبة الى هنا حلو

فيه كليات الله يعل العدو الى الآن ماشين على الكاش أو نظام شيكات أو فيه مشاكل على الحساب والبنت لازم تاخذ شيك

المهم الى هنا ماشي الحال لكن اللي لاحظته في أكثر من كليه إن مأمورة الصرف معاملتها زفت ودايم عليهم شغل تصريــــف

و إذا جات وحده تكلمها حتى ما تتعب عمرها وتناظر فيها تكلمها وهي مشغوله و باسلوب ما أدري وش أقول عنه ليه تدفع من جيبها وأنا ما أدري !!!

ليه إن شاء الله البنات يطرون منك ولا وش السالفه !!!!

اليوم وحده من البنات راحت تبغى تستلم شيك أنواع المماطله تعالي الساعه 1 الا ربع ليه هالوقت الله أعلم جات وحده الا ربع ما فيه أحد وين مأموره الصرف في الكنترول يا سلام والبنات عادي منطقين في المكان ما عندهم شغل أصلا وجايين عشان ياخذون شيكاتهم بس وبعدين مأمورة الصرف اللي أعرفه المفروض تكون محلها وش موديها الكنترول غريبه والله ؟؟!!!

و آخر الكلام بعد طول انتظار تقول الموظفه اللي معاها والله الأغراض بدرجها ما أقدر أسوي لكم شي وهي مشغوله ما راح تجي

مع العلم إنه هالأسلوب مو أول مره يصير دايم

لين متى هذا حالنا ومتى يتعدل الوضع ؟؟؟!!!

من جد حاله

الله يصلح الحال

احسبوا حساب لغيركم

Mon, 15 Jan 2007 21:42:00 GMT

في بعض الأحيان يراودنا تفكير بعمل مقالب وما إلى ذلك فيمن حولنا

لكن أخي الكريم / أختي الكريمه

حذار من استخدام الحركات المرعبه

لماذا ؟؟

قبل كل شيء

هذا الأمر محرم شرعاً

قد يكون قصدك التسليه و الضحك

لكن

لم تحسب حساب لمن حولك

تخيل أنك قمت بارسالها لشخص ليست لديه القدره على التحمل كمن لديهم أمراض القلب عافانا الله وإياكم أوامرأة حامل وما إلى ذلك

قد تقول لن أرسلها لشخص كهذا لكن بعض الناس لديهم أمراض لن يقولوا لك عنها ثم إنك قد ترسلها لشخص وهو بدوره يرسلها لعشرات الأشخاص وهكذا

أختي الكريمه / أخي الكريم لا تتسبب بالضرر لمن حولك دون قصد منك

لما لا يكون ترفيهنا خالي من الأمور التي قد تضر بمن حولنا

الرجاء نشرها لمن تعرف ليكون الحذر من الجميع

لا تنسوني ووالدايّ بالدعاء

والله حاله

Sun, 14 Jan 2007 18:29:00 GMT

السلام عليكم ورحمة الله وبركاته

في كل مكان نتكلم ونعبر عن استيائنا من أمور عديدة لكن بالعربي (محد معبرنا )

عندنا غلاء الأسعار بشكل غير طبيعي

و نتكلم ولا حولنا احد للأسف

وزارة التجاره ما تعبت نفسها أصلاً في مراقبة الأسعار

عشان كذا نص العالم تلاعب بالسعر على كيف كيفهم

المسأله إن كل شي غلا سعره بشكل غير طبيعي

موظفين الدوله جاهم زياده ما أدري كم 10ما أدري 15% طيب باقي العالم ما جاهم شي

طيب قالوا مكرمه ملكية يعني المفروض لتحسين الوضع المعيشي مو كل واحد مصمم يسحبها من جهه

يعني الزياده كانت نسبة من 10 الى 15 زيادة الأسعار في كل شي وغالباً نسبة الزياده اللي أشوفها 30% أو أكثر إلا
فيما ندر

وهالشي ملاحظ في كافة الأماكن تقريبا

وعندنا مشكله ثانيه الشعب شوي متهاون في بعض الأمور

إحنا هنا أذكر أنواع الشوكولا ( سنكرس / ومارس / باونتي / توكس ....الخ) كلها كانت بريال ونص فجأه صارت بريالين

صح المبلغ نص ريال وما يسوى

لكن ليه يلعبون علينا وإحنا نضحك

في الكويت يوم غلا عليهم ما ادري كم فلس محد اشترى توكس احتجاج، الشركة عشان ما تخسر رجعت على السعر الأول ما يعادل ريال ونص سعودي

لكن هنا عشان العالم ما تقول شي ونص ريال ما تسوى ظل على سعره يعني هذا مثال بسيط وأنتم لكم تقيسون على أكبر منها

أذكر جدي الله يرحمه من كم سنه
الكلام هذا ما تعدى 5 سنوات على الأكثر

قال أول اللي راتبه 10 آلاف في نعمه و يعتبر غني

لكن بيجي الوقت اللي راتبه 15 ألف يالله يعيش وكنا مستغربين من كلامه لكن فعلاً ما مر وقت طويل على هالكلام هذا أنا أشوف الكلام هالأيام يعني 15 ألف في أسرة يالله تعيشهم مع غلاء الأسعار في زمن (محد حولك ) للجميع فائق احترامي